काठमाडौँ, ४ असोज । पछिल्लो चौविस घण्टामा काठमाडौँ उपत्यकामा थप ७६७ जनामा कोरोना संक्रमण देखिएको छ । स्वास्थ्य तथा जनसंख्या मन्त्रालयले उपत्यकाका तीन जिल्लामा ३०५ जना महिला र ४६२ जना पुरुष गरी कुल ७६७ जनामा कोरोना संक्रमण देखिएको हो ।

मन्त्रालयका प्रवक्ता डा जागेश्वर गौतमका अनुसार काठमाडौँ जिल्लामा २३० महिला र ३७२ पुरुष गरी कुल ६०२ जना, ललितपुरमा ३४ महिला र ३० जना पुरुष गरी ६४ जना र भक्तपुरमा ४१ महिला र ६० पुरुष गरी १०१ जनामा संक्रमण देखिएको हो ।

त्यसैगरी पछिल्लो चौविस घण्टामा देशभर थप १ हजार ३२५ जनामा कोरोना भाइरस संक्रमण देखिएको छ ।

देशभरका बिभिन्न प्रयोगशालामा ९ हजार ५८४ जनाको पीसीआर बिधिबाट गरिएको नमुना परीक्षणका क्रममा थप १ हजार ३२५ जनामा कोरोना भाइरसको संक्रमण पोजेटिभ देखिएको हो।

पछिल्लो २४ घण्टामा देशभर थप ९६६ जना उपचारपछि निको भएर डिस्चार्ज भएका छन् ।