नेपालमा पनि सुरु भयो दक्ष प्रसुतिकर्मी (मिडवाईफ्री) पढाई, तीन वटाले स्वीकृति दुई वटामा सुरु

- नेपाली हेल्थ

midwife1

काठमाडौँ, ३० कात्तिक – नेपालमा पनि गर्भवती र सुत्केरी महिला तथा नवजात शिशुको हेरचाहमा केन्द्रीत हुने मिडवाइफ्री शिक्षा सुरु भएको छ ।व्याचलर इन मिडवाईफ्री साइन्स(बीएमएस) अध्यापनका लागि तीनवटा संस्थाले स्विीकृति लिएका छन भने दुईवटा संस्थाले अध्यापन प्रक्रिया सुरु गरेका छन् ।

काठमाडौँ विश्वविद्यालय अन्तर्गत स्कुल अफ मेडिसिन धुलिखेल क्याम्पसले ६ जना भर्ना लिएर कक्षा सुरु गरिसकेको छ भने चिकित्सा विज्ञान राष्ट्रिय प्रतिष्ठान(न्याम्स) बीर अस्पताल नर्सिङ क्याम्पसले १० सिटमा भर्ना खुलेको सूचना निकालेको छ । धरानस्थित विपी कोइराला स्वास्थ्य विज्ञान प्रतिष्ठानले कार्यक्रम सञ्चालन गर्ने स्वीकृति लिएर काम अघि बढाएको जनाएको छ ।

मिडवाईफ्री अध्ययनका लागि पीसीएल नर्सिङ उत्तीर्ण गरि एक बर्ष कार्यानुभव भएको हुनुपर्ने योग्यता तोकिएको छ । दक्ष प्रसूतिकर्मीको रुपमा चिनिने मिडवाइफ उत्पादन गर्न नेपाल नर्सिङ परिषद्ले तीनवटा स्वास्थ्य संस्थालाई स्वीकृति दिएको अध्यक्ष प्राध्यापक चन्द्रकला शर्माले बताइन् । उनले लामो प्रयासपछि नेपालमा मिडवाईफ्रि सुरु भएकोमा खुशी व्यक्त गरिन ।

नेपाल मिडवाईफ्री सोसाइटीकी अध्यक्ष प्राध्यापक किरण बज्राचार्यले लामो समय देखिको प्रयास अहिले आएर सफल भएको बताइन् । उनले मिडवाईफ्रीले साधारण सुत्केरी गराउने तर जटिलताको पहिचान गरि चिकित्सकको रिफर गर्ने ज्ञान हुने बताइन् । उनले मिडवाइफ्री जनशक्ति आएपछि सुरक्षीत मातृत्व अन्तरर्गत मातृमृत्युदर तथा शिशुमृत्युदरमा उल्लेख्य कमी हुने दावी गरिन् ।

न्याम्सका उपकुलपति प्राडा गणेश गुरुङले १० सिटमा मिडवाईफ्रि सुरु गर्न लागेको बताए । उनले पीसीएल नर्सिङ उत्तीर्ण गरेकाले एक बर्ष कार्यअनुभव लिएपछि मात्रै व्याचलर इन मिडवाईफ्रीमा भर्ना हुन सक्ने बताए ।

‘पश्चिमा मुलुक तथा विकसित देशमा महिला गर्भवती भएदेखि सुत्केरी हुँदासम्मको उपचार तथा स्याहार तथा नवजात शिशुको उपचार तथा स्याहारका लागि मिडवाईफ्री पढेका नर्स खटाइन्छ तर नेपालमा त्यस्तो छैन । हामीले अब सुरु गर्दैछौँ,’ उपकुलपति प्राडा गुरुङले भने ।

सरकारले गतवर्ष नै मिडवाइफ्री शिक्षा सञ्चालन गरी गाँउ गाँउमा मिडवाईफ्री खटाउदै शिशु तथा मातृमृत्युदर घटाउने योजना अघि सारेको थियो ।


Facebook Comment


थप समाचार