निःशुल्कको औषधि किनाउँदै कोसी अस्पताल

- नेपाली हेल्थ

cosi
मोरङ, १३ असोज – पथरी शनिश्चरे–१२ की शर्मिला शर्माको प्रसूतिको शल्यक्रिया गर्दा कोसी अञ्चल अस्पताल विराटनगरका चिकित्सकले रु चार हजार रुपैयाँको औषधि किनाए ।

व्यथा लगाउने औषधि सिनटो सिन, शल्यक्रिया गर्दा चिकित्सकले लगाउने ग्लोब, कटन, शल्यक्रिया गरिसकेपछिको घाउ सिउने धागोसमेत चिकित्सकले किन्न लगाए। उनी मात्र होइन बबिया विर्ताका रोजिना अधिकारीको प्रसूतिको शल्यक्रिया गर्दा पाँच हजार रुपैयाँको औषधि लाग्यो । उनका श्रीमान् खेम अधिकारीका अनुसार अस्पतालमा प्रसूति गराउँदा तीनदेखि सात हजारसम्मको शल्यक्रियाका लागि औषधि नै खरिद गर्नु परेको छ ।

रोजिना यतिखेर कोसी अञ्चल अस्पतालको ९१ नम्बरको शय्यामा आराम गरिरहेकी छन्। शर्मा अस्पतालको ९८ नम्बरको शय्यामा हुनुहुन्छ । उनीहरु त एउटा सामान्य उदाहरण हुन् । कोसी अञ्चल अस्पतालमा उनीहरु जस्ता धेरै प्रसूतिको सेवा लिन आएका सर्वसाधारणले सरकारले दिने निःशुल्क प्रसूति सेवाको औषधि प्राप्त गर्नबाट वञ्चित छन् । विगत एक वर्षदेखि कोसी अञ्चल अस्पतालको प्रसूति सेवा लिन आएका बिमारीका परिवारलाई औषधि किनाउने गरिएको छ ।

सरकारले देशैभरका स्वास्थ्य संस्थामा प्रसूति सेवा निःशुल्क गरेपनि कोसी अञ्चल अस्पतालमा विगत एक वर्षदेखि प्रसूतिको सेवा लिन आएका सर्वसाधारणलाई औषधि किनाउने गरिएको छ ।

पथरी शनिश्चरे–१२ की शर्मिला शर्माका भाइ अनिल शर्माका अनुसार सिनटोसिन, व्यथा लगाउने औषधि, क्याडगड, शल्यक्रिया गरेपछि सिलाउने धागो, एमोक्सी सिलिन, क्लोक्सा सिलिन शल्यक्रिया गरेको घाउ सुकाउने औषधि, पेनकिलर, घाउ दुखेको कम गराउने, एसिलक, ग्यास्टिक घटाउने, कटन शल्यक्रिया गरेको घाउ सफा गरेर छोप्ने कपडा, ग्लोब शल्यक्रिया गर्ने मान्छेले लगाउने पञ्जा लगायतका औषधि तथा औषधिजन्य सामग्री किनाउने गरेको पीडितको भनाइ छ ।

कोसी अञ्चल अस्पतालका मेडिकल सुपरिटेन्डेन्ट डा. रोशन पोखरेलका अनुसार सरकारले औषधि खरिद गर्ने रकम नपाएकाले अस्पतालले औषधि किन्न नसकेपछि सामान्य औषधि किन्न लगाएको स्वीकार गरे । उनले भने, “अस्पतालमा नभएका औषधि किन्न लगाएका हौँ ।” सो अस्पतालमा वर्षमा करिब दुई हजार पाँचसय सर्वसाधारणको प्रसूतिको शल्यक्रिया हुने गरेको छ ।

एकजना प्रसूतिको शल्यक्रिया गर्ने सेवाग्राहीलाई डाक्टरले दुई हजार पाँचसयको औषधि किनाउँदा वर्षमा रु ५० लाखको औषधि सर्वसाधारणले किन्छन् । अब सरकारले सर्वसाधारणलाई प्रदान गर्ने निःशुल्क प्रसूति सेवाका औषधि नपाउँदा सर्वसाधारणले अस्पताल प्रशासनप्रति शङ्का गर्न थालेको रोजिनाका श्रीमान् खेम अधिकारीको भनाइ छ ।

प्रसूति सेवाका लागि औषधि प्रत्येक वर्ष आइरहेको अस्पताल प्रशासनको भनाइ छ । तर अस्पतालले प्रसूति सेवा लिन आएका सर्वसाधारणलाई मर्कापर्नेगरी औषधि किनाएकामा सर्वसाधारण आक्रोशित छन् ।

स्थानीय सुभाष कामतका अनुसार एक वर्षदेखि अस्पतालले प्रसूतिका सेवाग्राहीलाई रु पाँचहजार देखि १० हजार रुपैयाँसम्मको औषधि किनाउने गरेको छ । सो अस्पतालमा दैनिक एक हजार सर्वसाधारण सेवा लिन आउने गरेका छन् । रासस


Facebook Comment


थप समाचार