अस्पतालमा आइसियु नहुँदा दैनिक रिफर मात्रै

रमेश गिरी / भक्तपुर, २६ साउन – गत साउन ११ गते चाँगुनारायणतर्फ यात्रु बोकेर जाँदै गरेको बस दुर्घटना हुँदा एकजनाको ज्यान गयो भने २३ जना घाइते भए ।

घाइतेको उपचारका लागि सिधै भक्तपुर अस्पताल ल्याइयो तर अस्पतालले आफैँ उपचार गर्नुभन्दा पनि एक घन्टाभित्र सबै घाइतेलाई मध्यपुर अस्पताल रिफर ग¥यो । अस्पतालमा गम्भीर घाइतेलाई उपचार गर्न सघन उपचार कक्ष (आइसियु) छैन भन्दै धमाधम अन्यत्रै पठाउन थालेपछि घाइतेको अवस्था बुझ्न अस्पताल आउनुभएका सांसद प्रेम सुवालले भक्तपुर अस्पताललाई रिफर अस्पतालको सङ्ज्ञा दिए ।

उनले अस्पतालका मेडिकल सुपरिटेन्डेन्ट डा हरिबहादुर केसीलाई बोलाएर अस्पताललाई व्यवस्थितरुपमा सञ्चालन गरी यहाँ आएका सबै बिरामीको उपचार गर्न आग्रह गर्दै आवश्यक सहयोगका लागि पहल गर्ने बताए । त्यसपछि पनि यस अस्पतालमा विभिन्न दुर्घटनामा घाइते भएका र अन्य रोगका लागि आकस्मिक कक्षमा आएका अधिकांश बिरामी रिफर गर्ने गरिएकै छ । विसं १९६१ असार १७ गते १५ शय्याको चन्द्रलोक डिस्पेन्सरीको नामबाट स्थापना भएको भक्तपुर अस्पताल बिरामी रिफर केन्द्रका रुपमा परिणत भएको छ ।

विसं २०२८ मा ५० शय्याको र २०६० सालमा थप २५ शय्याको प्रसूति गृहसमेत गरी हाल ७५ शय्यामा सञ्चालित भक्तपुरको एक मात्र सरकारी अस्पतालमा अहिलेसम्म पनि आइसियु सेवा नहुँदा अन्य सेवासमेत प्रभावित भएको छ । विगत एक वर्षमा मात्र प्रसूति सेवामा १७० जनाको शल्यक्रिया गरेर बच्चा निकालिएको र २९ जनाको पाठेघर निकाल्ने शल्यक्रिया गरेको अस्पतालका प्रशासन प्रमुख विश्वप्रसाद न्यौपानेले जानकारी दिए ।

उनले भने, “प्रसूति सेवामा १७०, पाठेघर निकालेको २९, मेजर ५५२ र माइनर एक हजार ६६८ गरी दुई हजार ४१९ जनाको शल्यक्रिया गरिएको छ, तर आइसियु नहुँदा समस्या भने छ ।” एक साताअघि मात्रै आइसियुमा राखेर उपचार गर्न नपाउँदा एक सुत्केरीको ज्यान गएको थियो । अस्पतालमा बच्चा जन्मिएपछि अत्यधिक रक्तस्रावका कारण सुत्केरी महिलालाई समस्या आएपछि आइसियुमा राखेर उपचार गर्नुपर्नेमा अन्य अस्पताल रिफर गर्दा सुत्केरीको ज्यान गएको थियो ।

भक्तपुर अस्पतालमा ती महिलाको ज्यान नगएको दाबी गर्दै प्रशासन प्रमुख न्यौपानेले आइसियु नहुँदा समस्या भने आएको बताउछन्। अस्पतालमा आइसियु बिनै जोखिम मोलेरै प्रसूतिदेखि अन्य विभिन्न रोगको शल्यक्रिया गरिन्छ । अस्पतालमा शल्यक्रिया गरेपनि आइसियुको आवश्यकता परे अन्य अस्पतालमा रिफर गर्ने गरेको अस्पताल प्रशासनले जनाएको छ । अस्पताल प्रशासनका अनुसार यो एक वर्षमा आकस्मिक कक्षमा मात्रै १२ हजार ५३४ बिरामी उपचारका लागि आएका थिए, तर गम्भीर प्रकृतिका बिरामीको भने रिफर गरिएको थियो ।

भक्तपुर अस्पतालमा विगत एक वर्षमा दुई हजार ४५४ जनाले भर्ना भएर उपचार गरेको र ५२ हजार ४९० जना बिरामीले ओपिडी सेवा लिएका छन् । अस्पतालका मेडिकल सुपरिन्टेन्डेन्ट डा केसीले अस्पतालका लागि आइसियु अतिआवश्यक भएको र बारम्बार आइसियुको माग भएपनि ढिलाइ भएको बताए ।

सरकारले केन्द्रीय अस्पतालका रुपमा यस अस्पताललाई स्वीकृति दिएपनि प्राविधिक सामानको अभावले केही समस्या आएको अस्पताल व्यवस्थापन समितिका अध्यक्ष नवराज गेलालले जानकारी दिए। अब केही समयमै पाँच शय्याको आइसियु सेवा सञ्चालन गर्ने तयारी गरेको बताउँदै उनले त्यसपछि भने बिरामी अन्य अस्पतालमा रिफर गर्नु नपर्ने दाबी गरे । रासस

समाचार / स्वास्थ्य सामाग्री पढनु भएकोमा धन्यवाद । दोहरो संम्वाद को लागी मेल गर्न सक्नु हुन्छ ।
सम्पर्क इमेल : nepalihealthnews@gmail.com

Leave a Reply

Your email address will not be published. Required fields are marked *