सिंहदरबारमै भएन धूमपान नियन्त्रण

  • धूपमान गर्ने मुख्य अखडा शौचालय !
  • - नेपाली हेल्थ

    singha-durbar1

    काठमाडौं –  सिंहदरबारभित्र बारम्बार ‘ड्रेस कोड’ लगाउन सर्कुलर जारी गर्दा अटेर गर्दै आएका कर्मचारीले लुकीछिपी धूमपानसमेत गर्ने गरेका छन् । सरकारले केही समयअघि सिंहदरबारलाई धूमपान निषेधित क्षेत्र घोषणा गरेको थियो ।

    प्रधानमन्त्री तथा मन्त्रिपरिषद् कार्यालय र राष्ट्रिय सतर्कता केन्द्रले सिंहदरबारलाई धूमपान निषेधित क्षेत्र घोषणा गर्दै त्यसलाई कडाइका साथ पालना गराउन सबै मन्त्रालय र निकायलाई सर्कुलर गरेको थियो । तर, प्रधानमन्त्री कार्यालय र सतर्कता केन्द्रको सर्कुलरलाई अधिकांश कर्मचारीले अटेर गर्दै लुकीछिपी धूमपान गर्ने गरेका छन् ।

    सामान्यको गोप्य अनुगमन

    यस विषयमा सामान्य प्रशासन मन्त्रालयले गोप्य रूपमा अनुगमन थालेको छ । सामान्य प्रशासन मन्त्रालयका उपसचिव कृष्णप्रसाद सापकोटाले सिंहदरबारलाई पूर्ण रूपमा धूमपान निषेधित क्षेत्र बनाउन अनुगमनलाई कडा पारिने जानकारी दिए ।

    सामान्यले प्रधानमन्त्री कार्यालय र राष्ट्रिय सतर्कता केन्द्रसँग समन्वय गरी धूमपान गर्नेविरुद्ध कानुनी कारबाही थाल्ने तयारीसमेत गरेको छ ।

    धूमपान गर्न मन्त्रालयभित्रै गोप्य ठाउँ

    सामान्यको अध्ययनअनुसार कर्मचारीले मन्त्रालयभित्रै विभिन्न गोप्य ठाउँ बनाएर धूमपान गर्ने गरेका छन् । यस्तै, शौचालयलाई धूमपान गर्ने स्थान बनाएको तथा मन्त्रालयले सञ्चालन गरेका विभिन्न क्यान्टिनमा गएर धूमपान गर्ने गरेको पाइएको छ ।

    सामान्यले सबै मन्त्रालय र निकायलाई पत्राचार गरी आफूमातहतका निकायलाई धूमपान नगर्न–नगराउन निर्देशन दिने तयारीसमेत गरेको छ ।

    • आजको नयाँ पत्रिका दैनिकमा समाचार छ

    Facebook Comment


    थप समाचार