राजविराज, २३ साउन – सप्तरीका बाढीपीडितलाई डा. गोविन्द केसीले निःशुल्क स्वास्थ्य उपचार गरेका छन् ।जिल्लाको तिलाठी गाविसका बाढीपीडितलाई स्थानीय राप्रावि विद्यालयको प्राङ्गणमा शनिबार उनले निःशुल्क स्वास्थ्य उपचार गरेका हुन् ।

सप्तरी उद्योग वाणिज्य सङ्घको संयोजन तथा तिलाठीका युवाको आयोजनामा डा. केसीले त्यहाँका १०० भन्दा बढी बाढीपीडितलाई हाडजोर्नी तथा नसासम्बन्धी रोगको उपचार गरेको बताइएको छ ।

डा. केसी शनिबार विहान आफैँले विभिन्न औषधि, फलफूललगायतका सामग्री बोकेर सो ठाउँमा पुगेका थिए । सरकारले स्वास्थ्य क्षेत्रमा दिइरहेको सेवा ग्रामीण भेगका जनतामा पुग्न नसकेको गुनासो गर्दै डा केसीले बाढी प्रभावित क्षेत्रमा आफूले मानवताका आधारमा सेवा गर्न आएको बताए ।

यसैबीच डा. केसीले गरिब बालबालिकाका लागि शिक्षामा पहुँच हुनुपर्ने माग गर्दै गरिराख्नुभएको सङ्घर्षप्रति उच्च सम्मान गर्दै तिलाठीका युवाले डा. केसीलाई शनिबार सम्मान गरेका थिए ।