काठमाडौं, २४ कात्तिक । चिकित्सा विज्ञान राष्ट्रिय प्रतिष्ठान (न्याम्स) वीर अस्पताल र नेपाल सशस्त्र प्रहरी अस्पतालबीच शैक्षिक कार्यक्रम सञ्चालन गर्ने समझदारी भएको छ ।

स्वास्थ्य मन्त्री मोहनबहादुर बस्नेतको उपस्थितिमा शुक्रबार स्वास्थ्य मन्त्रालयमा न्याम्सका उपकुलपति प्राडाभुपेन्द्र बस्नेत र नेपाल सशस्त्र प्रहरी अस्पतालका मेडिकल डाइरेक्टर डा. रुपक महर्जनले शैक्षिक कार्यक्रम बिस्तार गर्ने सम्वन्धी समझदारीपत्रमा हस्ताक्षर गरेका हुन ।

यो समझदारी पछि न्याम्सले निकट भविश्यमा आफ्ना उच्च तहका शैक्षिक कार्यक्रम सशस्त्र अस्पतालमा पनि बिस्तार गर्ने छ ।

सो अवसरमा बोल्दै स्वास्थ्य तथा जनसंख्या मन्त्री बस्नेतले गुणस्तरीय स्वास्थ्य सेवा उपलब्ध गराउन उच्च स्तरको दक्ष जनशक्ति आवश्यक पर्ने बताउदै न्याम्स र सशस्त्र प्रहरी अस्पतालबीच भएको शैक्षिक कार्यक्रम सञ्चालन गर्ने समझदारीले स्वास्थ्य क्षेत्रमा थप दक्ष जनशक्ति उत्पादन हुने आशा व्यक्त गरे ।

उनले शान्ति सुरक्षाका अलावा ससस्त्र प्रहरीले स्वास्थ्य उपचारका क्षेत्रमा पनि उल्लेखनीय कार्य गरेको भन्दै स्वास्थ्य मन्त्रालयले ससस्त्र प्रहरी अस्पताललाई सक्दो सहयोग जारी राख्ने आश्वासन दिए ।

नेपाल सशस्त्र प्रहरी महानिरीक्षक राजु अर्यालले न्याम्ससँगको शैक्षिक समझदारीले भविश्यमा ससस्त्र प्रहरी अस्पतालले मेडिकल कलेज स्थापना गर्ने ढोका खोल्ने बताए ।

स्वास्थ्य तथा जनसंख्या मन्त्रालयकी सचिव देवकुमारी गुरागाइले चिकित्सा क्षेत्रमा उच्च स्तरको जनशक्ति उत्पादन गर्ने क्षेत्रमा यो समझदारीले फड्को मार्ने बताइन । न्याम्सका उपकुलपति प्राडा बस्नेतले न्याम्सका पदाधिकारीले निरीक्षण गर्दा सशस्त्र प्रहरी अस्पतालले प्रदान गरिरहेको उपचार सेवा र प्रयाप्त भौतिक पूर्वाधार भएको पाइएपछि शैक्षिक कार्यक्रम सञ्चालन गर्नका लागि समझदारी पत्रमा हस्ताक्षर गरेको बताए ।

सशस्त्र प्रहरी अस्पतालका मेडिकल डाइरेक्टर डा. महर्जनले यो समझदारीपछि सशस्त्र प्रहरी अस्पतालमा शैक्षिक वातावरण सिर्जना हुने बताउँदै यसले अस्पतालले गुणस्तरीय सेवा प्रदान गर्ने कार्यमा सकारात्मक प्रभाव पार्ने आशा व्यक्त गरे ।

न्याम्सका रेक्टर डा। लोचन कार्कीले न्याम्सले अनुगमन र निरीक्षण पछि देशका विभिन्न हस्पिटलहरुसँग सहकार्य गर्दै आफ्ना उच्च तहका शैक्षिक कार्यक्रम अगाडि बढाइरहेको बताए । न्याम्सका रजिस्टार डा. ज्ञानेन्द्र शाहले सशस्त्र प्रहरी अस्पताल र न्याम्सबीच भएको समझदारीले चिकित्सा शिक्षामा नयाँ फड्को मार्ने विश्वास व्यक्त गरे । ११० शैयाबाट सुरु गरिएको सशस्त्र प्रहरी अस्पताल अहिले १९० शैयामा सञ्चालित छ ।