काठमाडौँ, २० कात्तिक । पाटन अस्पतालमा उपचाररत दुई बिरामीको सुईबाट औषधि दिएको केही बेरमै मृत्यु भएको छ । निमोनियाको उपचार गराईरहेका ओखलढुंगाकी ९० बर्षीया जनमाया राई र ललितपुरका ६८ बर्षीय कृष्णबहादुर नगरकोटीको औषधि दिएको केही बेरमै मृत्यु भएको हो ।

मृत्युपछि आफन्तहरुले चिकित्सक तथा स्वास्थ्यकर्मीको लापरवाही भएको आरोप लगाउदै आक्रोशित भएका थिए । सो क्रममा उनीहरुले डिउटीमा रहेका केही चिकित्सक तथा नर्सहरुमाथि हातपात तथा दुर्व्यहार गरेको बताइएको छ । हातपात र दुर्व्यहारको विरोधमा पाटन अस्पतालका आवासीय चिकित्सकहरु आन्दोलनमा उत्रिएका छन् ।

घटना के थियो ?
घटना शनिबार दिउँसोको हो । अस्पतालको जेष्ठ नागरिक वार्डमा भर्ना भएका उनीहरुमाथि ड्युटीमा भएका नर्सले सुई मार्फत दुई एन्टिबायोटिक औषधि चलाएका थिए । त्यसको पाँच मिनेटमै दुबै बिरामीको मृत्यु भएको थियो ।

अस्पतालका मेडिसिन विभागका प्रमुख प्राडा युवराज शर्माका अनुसार दुबै बिरामीलाई ‘सेफ्ट्रियाक्सोन’ र रगत पातलो गर्ने औषधि ‘हेपारिन’ चलाइएको थियो ।

मृत्यु भएका नगरकोटी १० कात्तिकमा र राई १६ कात्तिकमा उपचारका लागि अस्पतालको जेष्ट नागरिक वार्डमा भर्ना भएका थिए ।

प्राडा शर्माले उनीहरु दुवै एउटै वार्डमा भर्ना भएको बताए ।

‘दुबैलाई निमोनियाको गम्भीर संक्रमण थियो । उनीहरुलाई अक्सिजन दिएर उपचार गरिएको थियो । नगरकोटीमा भने निमोनियासँगै कलेजोको समस्या देखिएको थियो । तर, उनको स्वास्थ्य अवस्था सुधार आउँदै गएकोले अक्सिजन सहित डिस्चार्ज गर्ने तयारी थियो,’प्राडा शर्माले भने ।

‘यी दुबै औषधि सुरक्षित हुन र भर्ना भएका बिरामीलाई सबैभन्दा बढी प्रयोग हुने औषधि हुन् । उहाँहरुलाई पनि सुरु देखि नै यहि औषधि चलाउँदै आएको हो । सुधार पनि हुँदै थियो । तर अचानक स्वास्थ्य विग्रियो,’ प्राडा शर्माले भने । उनले बिरामीको मृत्यु हुनुमा इन्जेक्सन नै मुख्य कारण नहुन पनि सक्ने बताए । उनले बिरामीको मृत्यु हुनुमा अन्य धेरै कारण हुनसक्ने बताए ।

अस्पतालका निर्देशक डा. रवि शाक्यका अनुसार कहिलेकाहीँ जेष्ठ नागरिकको अचानक मृत्यु हुनु स्वाभाविक मानिन्छ । ‘नर्सले औषधि दिइसकेपछि तुरुन्तै ५ मिनेट भित्र नै दुवैको मृत्यु भएको थियो । त्यसकारण पनि बिरामीको आफन्तलाई शंका उत्पन्न भएको हो,’ शाक्यले भने, ‘औषधिकै कारणले मृत्यु नभएकोमा हामी विश्वस्त छौं । यद्यपि हामी पनि के कारण भयो भन्ने कुरा जान इच्छुक छौं ।’

आइतबार ललितपुरको प्रहरी प्रशासनको रोहबरमा अस्पताल प्रशासन र बिरामीको आफन्तबीच छलफल भएको थियो । जुन छलफलबाट औषधि परीक्षण र मृत्युको कारण पत्ता लगाउनका लागि पोस्टमार्टम गरिने भएको थियो । सोही अनुसार सो व्याचको औषधि परीक्षणका लागि पठाइएको डा शर्माले बताए ।

उनले ९० वर्षीया राईका आफन्तले हिजो नै शब बुझेको बताए । यता नगरकोटीको शब भने पोष्टमार्टम लागि अस्पतालमा राखिएको छ ।

चिकित्सक आन्दोलनमा
यसैबीच बिरामीको मृत्युपछि आफ्ना सहकर्मीहरुमाथि कुटपिट तथा दुर्व्यहार भएको भन्दै पाटन अस्पतालका आवासीय चिकत्सिकहरु आन्दोलनमा उत्रिएका छन् । स्वास्थ्यकर्मीका लागि सुरक्षित कार्यस्थल संघर्ष समितिको नामबाट उनीहरुले आन्दोलन सुरु गरेका हुन् । उनीहरुको आन्दोलनका कारण पाटन अस्पतालको सेवा प्रभावित भएको बताइएको छ ।

अस्पतालका चिकित्सक डा दिक्षान्त आचार्यका अनुसार चिकित्सक तथा स्वास्थ्यकर्मीले आफ्नो कर्तव्य निर्वाह गरिरहेका बेला बिरामीका आफन्तहरुले कुटपिट गरेका थिए । उनीहरुले डा असिम बाटाजु (रुमेटोलोजीको फेलो) र डा चन्दन यादव (रेजिडेन्स चिकित्सक प्रथम वर्ष) माथि आक्रमण गरेका हुन् । चिकित्सकहरुले स्वास्थ्यकर्मी तथा स्वास्थ्य संस्था सुरक्षा सम्वन्धी ऐनको कार्यान्वयन गर्दै आक्रमणकारीमाथि कार्वाही गर्न माग गरेका छन् ।

यसैबीच नेपाल चिकित्सक संघले पनि चिकित्सक माथि आक्रमण भएको भन्दै सुरक्षाका लागि राज्यको ध्यानाकर्षण गराएको छ । उसले जेष्ठ नागरिकको मृत्यु के कारणले भयो छानविन गरी यथार्त विवरण सार्वजनिक गर्न समेत प्रशासनको ध्यानाकर्षण गराएको छ ।