काठमाडौँ, १७ भदौ । पछिल्लो चौबिस घण्टामा नेपालमा थप १२ जना कोरोना संक्रमितको मृत्यु भएको छ । स्वास्थ्य तथा जनसंख्या मन्त्रालयको नियमित कोरोना ब्रिफिङका क्रममा प्रवक्ता डा.जागेश्वर गौतमले चौबिस घण्टामा थप १२ जनाको मृत्यु भएको बताए ।

प्रवक्ता डा।गौतमले ६ जना महिला र ६ जना पुरुष गरी थप १२ जनाको कोरोना संक्रमणबाट मुत्यु भएको बताए । जसमा चितवनका ५५ र १८ वर्षीय, काठमाडौँको ८९ वर्षीय, ललितपुरको ७० वर्षीय तनहुँको २० वर्षीय र कपिलवस्तुको ६० वर्षीय महिला सहित वाराका ९७ वर्षीय, चितवनका ६५ वर्षीय, भक्तपुरका ४० वर्षीय काठमाडौँका ७० र ७५ वर्षीय, र धादिङका ४७ वर्षीय पुरुष हुन् ।

यी सहित नेपालमा हालसम्म कोरोना संक्रमणबाट मृत्यु हुनेको संख्या २५१ पुगेको छ ।

पछिल्लो चौविस घण्टामा देशभर १ हजार १२० जनामा कोरोना भाइरस संक्रमण देखिएको छ । कोरोना संक्रमणबाट मुक्त भई घर फर्कनेको संख्या १ हजार ११२ रहेको छ ।