एजेन्सी ।आतंककारी समूह इस्लामिक स्टेट (आईएसआईएस)ले आफ्ना लडाकुलाई युरोपका शहरहरुमा  आक्रमण गर्नु अघि कोरोना भाइरसको संक्रमणको ख्याल गर्न भनेको छ ।

उसले अहिले सकेसम्म युरोप नछिर्न भन्दै छिरिहालेको भए कोरोना भाइरसको ख्याल गर्न तथा सतर्कता अपनाउन आफ्ना सदस्यलाई निर्देशन दिएको न्युयोर्क टाइम्सले उल्लेख गरेको छ ।

आईएसआईएसले आइतबार अल नबा बुलेटिन मार्फत आफ्ना लडाकुलाई जारी गरेको ट्राभल एडभाईजरीमा महामारीग्रस्त युरोपका देशमा अहिले सकेसम्म नछिर्न भनेको छ । अहिले महामारीग्रस्त मुलुकमा नछिर्नु । छिरिसकेको भए सुरक्षित रहनु, त्यही ठाँउमा रहनु, फर्केर नआउनु । यसले स्वस्थ मान्छेलाई अस्वस्थ बनाउनसक्छ । उसले बुलेटिनमा आफ्ना सदस्यहरुलाई निर्देशन दिएको छ ।

यस्तै स्यानिटाइजरको प्रयोग गर्न मास्कको प्रयोग गर्न, नियमित रुपमा हात धुन समेत आफ्ना लडाकुहरुलाई निर्देशन दिएको छ ।

विश्व स्वास्थ्य संगठन(डव्लुएचओ)ले दिने गरेको निर्देशन आफ्ना लडाकुलाई दिएपनि आइएसआईएसले त्यो डव्लुएचओको निर्देशन दिएको नभई पैंगम्बर मोहम्मदको निर्देशन पालना गरेको बताएको छ ।

केही बर्ष अघिसम्म युरोप, मध्यपूर्व र अमेरिकी देशमा तहल्का मच्चाएको आईएसआईएसको पछिल्ला दिनमा गतिविधि सुस्ताएको छ ।