काठमाडौँ, २३ चैत । नेपाल फार्मेसी परिषद्ले फार्मेसी विषय अध्ययन गराउने सबै विश्वविद्यालय, प्रतिष्ठान, शैक्षिक संस्था, स्कूल/कलेजहरू सँग पूर्णकालीन शैक्षिक जनशक्तिको विवरण माग गरेको छ।

परिषद्ले शुक्रबार सार्वजनिक सूचना जारी गर्दै फार्मेसी शिक्षण संस्थाहरूमा कार्यरत सम्पूर्ण पूर्णकालीन शिक्षक, प्राध्यापकहरुको विवरण अनिवार्य उपलब्ध गराउन भनेको हो।

फार्मेसी व्यवसाय अध्ययन गराउने सबै शैक्षिक संस्थाहरुले ३५ दिन भित्र कार्यरत सम्पूर्ण पूर्णकालीन शिक्षक, प्राध्यापकहरुको विवरण परिषद्को कार्यालय वा इमेल मार्फत पेश गर्नुपर्ने रजिष्ट्रार सञ्जिबकुमार पाण्डेयले जानकारी दिए।

परिषद्ले शैक्षिक संस्थाहरुलाई विवरण माग गर्दा मुख्य रुपमा चारवटा कागजात अनिवार्य गरेको छ ।

जसमा परिषदद्वारा जारी नाम दर्ता प्रमाणपत्रको प्रतिलिपि (सम्बन्धित फर्मासिष्टको) सम्बन्धित शिक्षकरकर्मचारीको योग्यताको प्रमाणित प्रतिलिपि (शैक्षिक प्रमाणपत्र, अनुभव प्रमाणपत्र), नियुक्ति पत्र र सेवा अवधिको प्रमाणित विवरण र संस्थाको प्रमाणित प्रस्ताव उपलब्ध गराउन भनेको छ।

रजिष्ट्रार पाण्डेयले विवरण आईसकेपछि देशमा फार्मेसी अध्यापन गराउने कति जनशक्ति रहेछन् ? कलेजहरुको फ्याकल्टी अवस्था कस्तो रहेछ ? भन्ने बारेमा पनि एकीन जानकारी हुने बताए ।