काठमाडौँ, १३ माघ । स्वास्थ्य पत्रकार मञ्च नेपालद्धारा प्रदान गरिने ‘क्रियाशील स्वास्थ्य पत्रकारिता पुरस्कार’ यसवर्ष अजिता रिजाले प्राप्त गरेकी छन् । अंग्रेजी दैनिक ‘द राईजिङ नेपाल’मा आवद्ध उनी लामो समय देखि स्वास्थ्य विटमा कलम चलाउँदै आएकी छन् ।

शनिबार सम्पन्न स्वास्थ्य पत्रकार मञ्च नेपालको दशौँ बार्षिक साधारण सभा तथा छैटौं राष्ट्रिय अधिवेशनको अज्ञवसरमा रिजाललाई स्वास्थ्य मन्त्री प्रदीप पौडेल, पुरस्कारका संस्थापक बासुदेव न्यौपाने र मञ्चका अध्यक्ष सरोज ढुंगेलले संयुक्त रुपमा पुरस्कार हस्तान्तरण गरेका थिए ।

पछिल्लो समय मोफसलमा रहेर स्वास्थ्य पत्रकारितामा क्रियाशिल पत्रकार बासुदेव न्यौपानेले स्वास्थ्य पत्रकार मञ्चसंग सहकार्य गर्दै यो पुरस्कार स्थापना गरेका हुन् ।

१० हजार राशीको यो पुरस्कार हरेक दुई दुई वर्षमा हुने अधिवेशनका बेला प्रदान गरिदै आएको छ । यसअघि यो पुरस्कार नेपाल समाचार पत्र दैनिकमा कार्यरत भगवती तिमल्सेनाले प्राप्त गरेकी थिईन् ।