काठमाडौँ, १३ असोज । अबिरल परेको भारी वर्षासंगै हनुमन्ते खोलामा आएको बाढी पसेपछि भक्तपुरमा रहेको सिद्धि स्मृति महिला तथा बाल अस्पतालको सेवा अनिश्चित कालका लागि बन्द गरिएको छ । अस्पतालले अर्को सूचना जारी नहुँदासम्मका लागि सबै सेवाहरु बन्द गरिएको जनाएको छ ।

सो अस्पतालल गत विहीबार देखि परेको अबिरल वर्षापछि आएको बाढीबाट नराम्ररी प्रभावित भएको थियो । हिजो मात्रै त्यहाँ रहेका केही बिरामीहरुलाई उद्धार गरी अन्यन्त्र पठाइएको थियो । अस्पतालको हाता भित्र बाढीबाट अत्यधिक प्रभावित भएकोले सेवा दिन नसक्ने अवस्थाको सिर्जना भएको सूचनामा उल्लेख छ ।

सो अस्पताल करीव दुई महिना अघि पनि यसै गरी बाढी पसेका कारण बन्द भएको थियो । गत १६ साउनमा पनि अस्पतालको हाता भित्र बाढीबाट अत्यधिक प्रभावित भई अत्यावश्यक सेवा दिन नसक्ने अवस्थाको सिर्जना भएको भन्दै सेवा बन्दको घोषणा गरेको थियो । त्यसबेला पाँच दिन बन्द भई २१ साउन देखि सेवा सुचारु भएको थियो ।

काठमाडौँ उपत्यकामा ठूलो क्षति पुग्ने गरि आएको रेकर्ड ब्रेक वर्षाले हिजो उपत्यकाका, किष्ट मेडिकल कलेज, बयोधा, मेडिसिटी लगायतका अस्पतालमा पनि असर गरेको थियो । वर्षासंगै आएको बाढीबाट ती अस्पताल समेत डुवानमा परेका थिए ।