काठमाडौँ, १३ भदौ । सरकारले मुख्यसचिवमा एकनारायण अर्याललाई नियुक्त गरेको छ । बिहीबार बसेको मन्त्रिपरिषद् बैठकले सचिव अर्याललाई मुख्य सचिव बनाउने निर्णय गरेको हो । बीचमा कुनै अबरोध नभए उनी दुई वर्ष उक्त पदमा रहने छन् ।

अहिलेको मुख्य सचिव लीलादेवी गड्तौलाले ५८ वर्षे उमेर हदका कारण भोलि (शुक्रबार) देखि अवकाश पाउँदैछिन् । उनी गत १० साउनमा मुख्यसचिव नियुक्त भएकी थिइन् । नव नियुक्त मुख्य सचिव अर्याललाई भोलि पद हस्तान्तरण गरेर बाहिरिने योजनामा उनी रहेकी छन् ।
न

हाल गृह सचिव रहेका अर्याल सचिवहरुको वरियतामा चौथो नम्बरमा थिए । राष्ट्रिय योजना आयोगका सचिव तोयानारायण ज्ञवाली पहिलो, सार्वजनिक खरिद अनुगमन कार्यालयका सचिव रामकृष्ण सुवेदी दोस्रो र महिला बालबालिका तथा ज्येष्ठ नागरिक मन्त्रालयका सचिव दिनेश भट्टराई तेस्रो वरीयतामा थिए ।

तर सरकारले चौथो नम्बरमा रहेका अर्याललाई मुख्यसचिव बनाएको हो ।

विसं २०४६ सालमा प्रशासन सेवातर्फ नायबसुब्बा पदबाट निजामती सेवामा प्रवेश गरेका अर्याल २०५१ सालमा अधिकृत, २०५८ सालमा उपसचिव, २०६७ सालमा सहसचिव हुँदै २०७६ सालमा सचिव पदमा बढुवा भएका थिए ।