काठमाडौँ, २० चैत । सर्बोच्च अदालतले डा विकास देवकोटालाई स्वास्थ्य सचिव बनाउने सरकारको निर्णय विरुद्ध अतिरिक्त स्वास्थ्य सचिव डा संगीता मिश्राद्धारा दायर रिटमा अन्तरिम आदेश नदिने निर्णय गरेको छ ।

न्यायाधीय द्धय डा मनोजकुमार शर्मा र टेकप्रसाद ढुंगानाको संयुक्त इजलासले अन्तरिम आदेश नदिने निर्णय गरेको हो । तर मुद्धालाई अग्राधिकार भने दिने निर्णय गरेको छ ।

गत २१ फागुनको मन्त्रिपरिषद् बैठकले डा विकास देवकोटालाई सचिव बनाएपछि डा मिश्राले निर्णय कार्यान्वयन नगर्ने अन्तरिम आदेशको माग गर्दै सर्बोच्च गएकी थिईन । उनले रिटमा आफू बरिष्ठ भएको भन्दै सचिव बनाउन र डा विकासलाई सचिव बनाउने निर्णय खारेजीको माग गरेकी छन् । उनले तत्कालका अन्तरिम आदेश दिन समेत माग गरेकी थिईन् ।

डा मिश्राले आफूभन्दा कनिष्ठलाई सचिव बनाएको भन्दै गत १ चैतमा सर्बोच्चमा रिट दर्ता गरेकी थिईन ।

उनको रिट पछि पहिलो र दोस्रो सुनुवाईमा सर्बोच्चले सरकारका नाममा क्रमश कारण देखाउ आदेश र निर्णय फाइल झिकाउने आदेश जारी गरेको थियो । त्यसपछिका दुईवटा पेशी भने हेर्न नभ्याईने स्थितिमा रहेको थियो ।