काठमाडौँ, १९ चैत । पूर्व स्वास्थ्य मन्त्री समेत रहेका  सांसद दीपक बोहराको निधन भएको छ ।

राष्ट्रिय प्रजातन्त्र पार्टी (राप्रपा) का वरिष्ठ नेता समेत रहेका बोहराको उपचारको क्रममा काठमाडौंको ओम अस्पतालमा निधन भएको हो ।  उनी रुपन्देही क्षेत्र नम्बर – ३ बाट निर्वाचित सांसद हुन् ।

कोभिड – १९ महामारीको दोस्रो लहर चलेका बेला (जेठ २०७७) संक्रमणमा परेका थिए । त्यसपछि उनी बोल्न नसक्ने अवस्थामा पुगेका थिए ।

चिकित्सकहरुले पोस्ट कोभिड समस्याले गर्दा यस्तो भएको  बताउने गरेका थिए । पोष्ट कोभिडबाट स्वर भासिएको बोहोराको पछि घाँटीको क्यान्सर देखिएको बताइएको थियो ।

परिवारले उपचारका लागि बोहोरालाई यसबीचमा दिल्ली र अमेरिकाको न्यूयोर्क सम्म पुरयाएका थिए । चिकित्सकहरूले भने पोष्ट कोभिडका कारणले घाँटीमा समस्या भएको बताएका थिए । त्यसयता उनी स्पीच थेरापी गर्दै आएका थिए ।

बोहोरा ३१ असोज २०७४ मा स्वास्थ्य तथा जनसंख्या मन्त्री बनेका थिए ।

उनी बहाल रहेकै बैला २०७४ सालमा भएको आम निर्वाचनमा रुपन्देही – ३ बाट पराजित भएका थिए । तर २०७९ मा भएको पछिल्लो आम निर्वाचनमा भने सोही क्षेत्रबाट निर्वाचित भएका थिए ।