काठमाडौँ, ७ चैत । नेपाललाई लामो समय देखि औषधी तथा उपकरणमा सहयोग गर्दै अमेरिकी च्यारिटि संस्था डाइरेक्ट रिलिफले अब क्यान्सर रोगको औषधी समेत सहयोग गर्ने भएको छ । सो संस्थाले क्यान्सर रोगको उपचारमा प्रयोग हुने ‘केमो’ (औषधी) निशुल्क उपलव्ध गराउने तयारी गरेको हो ।

पछिल्लो पटक डाइरेक्ट रिलिफले नेपालमा पक्षघातका बिरामीलाई प्रयोग हुने एल्टीप्लेस २० एमजी को ८०० भाइल औषधी सहयोग गरेको छ । बिहीबार स्वास्थ्य तथा जनसंख्या मन्त्रालयका भएको सोही औषधी हस्तान्तरण कार्यक्रममा स्वास्थ्य मन्त्री प्रदीप पौडेलले क्यान्सर रोगबिरुद्ध प्रयोग हुने महंगा औषधी (केमो) पनि निशुल्क आउने बताएका हुन । उनले ती औषधी पनि डाइरेक्ट रिलिफबाट सहयोग हुने बताए ।

‘स्ट्रोकमा प्रयोग हुने यी औषधीसंगै हामीले क्यान्सरमा प्रयोग हुने केमो (औषधी) पनि निशुल्क प्राप्त हुने गरी डाइरेक्ट रिलिफसंग सम्झौँता गरिसकेका छौँ । औषधी भने आउन बाँकी नै छ । केही समय पछि आउँछ नै,’ पत्रकार सम्मेलनमा मन्त्री पौडेलले भने, ‘आम सर्वसाधारण, गरीब नेपालीलाई उपचारको सहज पहुँचका लागि महंगो पर्ने औषधीहरुलाई च्यारिटेवल संस्थासंग समन्वय गरेर व्यवस्था मिलाउँदै छौँ । यसले आम नागरिकलाई पक्कै पनि राहत हुने छ भन्ने विश्वास लिएको छु ।’

पक्षघातका बिरामीलाई प्रयोग हुने ८०० भाइल एल्टीप्लेस २० एमजी औषधी हस्तान्तरण

यसैबीच डाइरेक्ट रिलिफले पठाएको ८०० भाइल एल्टीप्लेस – २० एमजी औषधी नेपालमा उसको कार्यक्रम संयोजन गर्ने संस्था वान हार्ट वर्ल्डवाइडले सरकारलाई बुझाएको छ ।

बिहीबार स्वास्थ्य मन्त्री पौडेलको उपस्थितिमा वान हार्ट वर्ल्डवाइडका नेपाल निर्देशक सूर्य भट्टले स्वास्थ्य सेवा विभाग व्यवस्थापन महाशाखाका निर्देशक डा पवनजंग रायमाझीलाई हस्तान्तरण गरे ।

त्यसअघि बोल्दै भट्टले सन् २०१५ देखि डाइरेक्ट रिलिफसंग सहकार्य र समन्वय गर्दै आफ्नो संस्था अघि बढेको भन्दै नेपालमा स्वास्थ्य उपकरण, पूर्वाधार तथा औषधी क्षेत्रमा डाइरेक्ट रिलिफको ठूलो सहयोग भएको बताए । उनले आवश्यकता अनुसार स्वास्थ्यमा थप सहयोग पनि हुने जानकारी दिए ।

•  अब मस्तिष्कघातको उपचार पनि नि:शुल्क गर्दैछौँ : स्वास्थ्य मन्त्री पौडेल
• पक्षघातका बिरामीका लागि प्रयोग हुने नि:शुल्क औषधी नेपाल आइपुग्यो, सरकारी अस्पतालमार्फत बिरामीले पाउने

स्वास्थ्य सेवा विभाग व्यवस्थापन महाशाखाका प्रमुख डा रायमाझीले पहिलो चरणमा न्युरोलोजीमा डीएम गरेका चिकित्सक भएका तीनवटा सरकारी संस्थामा यो औषधी पठाउन लागेको बताए । उनले पहिलो चरणमा वीर अस्पताल, त्रिवि शिक्षण (टिचिङ) अस्पताल र भरतपुर अस्पतालमा पठाउन लागिएको बताए ।

स्वास्थ्य तथा जनसंख्या मन्त्रालयका डा गुणनिधि शर्माले मस्तिष्कको रक्तनलीमा रगत जमेर हुने पक्षघातमा साढे ४ घण्टा भित्र यो औषधी दिन सकिएमा बिरामीलाई तत्काल सुधार आउने विभिन्न अनुसन्धानले पुष्टि गरेको बताए ।

स्वास्थ्य मन्त्री पौडेलले भने पहिलो चरणमा तीनवटा अस्पतालमा यसको वितरण भए पनि क्रमश प्रदेश तहमा रहेका संघीय अस्पतालहरुमा उपलव्ध हुने गरी व्यवस्था मिलाउने जानकारी दिए । मन्त्री पौडेलले समयमै उपचार पाए ज्यान जोगाउन सकिने भए पनि आर्थिक अभावमा कतिपय नागरिकको ज्यान गएकाले महँगो औषधी सहयोग प्राप्त गरेर उपलब्ध गराइन लागिएको बताए ।

‘निकै महँगो औषधी किनेर दिन गाह्रो परेको थियो,’ उनले भने, ‘कसरी उपलब्ध गराउन सकिन्छ भनेर पहल गरेका थियौं । अहिले औषधी उपलब्ध भएको छ ।’