काठमाडौं, ११ माघ । हिमोफिलियाका बिरामीलाई दिईदै आएको निशुल्क औषधीको वितरण तथा व्यवस्थापनको जिम्मा अब सरकारले लिने भएको छ ।

विश्व हिमोफेलिया महासंघको सहयोगमा नेपाल फिमोफिलिया सोसाइटीले विगत वर्षहरु देखि नै हिमोफिलियाका बिरामीहरुलाई आवश्यक महंगा औषधीहरु निशुल्क वितरण गर्दै आएको थियो ।

अहिले वीर अस्पताल, कान्ति बाल अस्पताल, सिभिल सहितका ८ वटा अस्पतालमा उपचारका लागि जाने विरामीहरुले रगत जमाउने आवश्यक तत्व (क्लटिङ फ्याक्टर) सहितका औषधीहरु निशुल्क प्राप्त गर्दै आएका छन् ।

पछिल्लो समय महासंघले दिइएका निशुल्क औषधीको व्यवस्थापन र वितरणको जिम्मा सरकारबाट होस भन्ने चाहना राखेपछि स्वास्थ्य तथा जनसंख्या मन्त्रालयले सोही अनुसार गर्ने गरी निर्णय गरेको नीति योजना महाशाखाका प्रमुख डा कृष्ण पौडेलले बताए । उनका अनुसार अब यी औषधिहरु स्वास्थ्य सेवा विभाग व्यवस्थापन महाशाखाबाट आवश्यक अस्पताल तथा स्वास्थ्य संस्थामा वितरण हुनेछ ।

स्वास्थ्य सेवा विभाग व्यवस्थापन महाशाखाका निर्देशक डा पवनजंग रायमाझीले यसअघि सोसाइटीबाट हुँदै आएको वितरण तथा व्यवस्थापन अब सरकारी संयन्त्रबाट हुन लागेको जानकारी दिए । ‘हिजो मन्त्री ज्यूले सो सम्वन्धी निर्णय सदर गरिदिनु भएको छ । अब खोपहरु जस्तै गरी यो अनुदानका औषधिको व्यवस्थापन र वितरणको जिम्मेवारी व्यवस्थापन महाशाखाले गर्नेछ,’ उनले भने ।

स्वास्थ्य मन्त्री प्रदीप पौडेलले बिहीबार ‘रगत नजम्ने दुर्लभ किसिमको वंशाणुगत रोग हिमोफिलिया उपचारका लागि आवश्यक औषधी राज्यकोषमा थप भार नपर्ने गरि अन्तर्राष्ट्रिय सहयोग प्राप्त गरेर निशुल्क उपलब्ध गराउने निर्णय गरेका छौं,’ भनेर सामाजिक सञ्जालमा जानकारी गराएका छन् ।

यस सम्वन्धि उपचारमा सम्लग्न कतिपय चिकित्सकहरुले भने पहिले देखि नै आइरहेको कुरालाई नयाँ काम जसरी प्रचार गरेको भन्दै आलोचना समेत गरेका छन् ।

‘महासंघबाट निशुल्क औषधी पहिले देखि नै प्राप्त थियो । अब त्यो औषधिको वितरण तथा व्यवस्थापन व्यवस्थापन महाशाखाबाट हुने मात्रै कुरा हो । मन्त्री ज्यूले नयाँ र पहिलो पटक औषधी आए जस्तो भन्नु भयो त्यो होईन,’ एक जना चिकित्सकले नाम उल्लेख नगर्ने सर्तमा भने ।

तीन बर्ष अघि अर्थात विसं २०७८ सालको राष्ट्रिय जनगणनाले नेपालमा ४ हजार ९३७ जना हिमोफिलियाका बिरामी भएको उल्लेख गरेको छ ।तर, यसको तथ्यांक राख्दै आएको संस्था नेपाल हिमोफिलिया सोसाइटीले भने उपचारको पहुँचमा ८१४ जना (१६.४८ प्रतिशत) मात्र रहेको जनाएको छ ।