काठमाडौँ, १४ पुस । विगत १५ दिन देखि त्रिवि शिक्षण अस्पतालमा उपचाररत क्रान्तिकारी कम्युनिष्ट पार्टी नेपालका महासचिव मोहन वैद्य किरणलाई थप समस्या आएपछि आईसीयूमा सारिएको छ ।

अस्पताल स्रोतका अनुसार वैद्यको स्वास्थ्य थप बिग्रिएपछि शनिबार विहान सुरेश वाग्ले क्यान्सर सेन्टर भवनमा रहेको नयाँ आईसीयूमा सारिएको हो ।

त्यसअघि उनलाई अस्पतालको एनेक्स टू क्याविनमा राखिएको थियो ।

‘अस्ती केही सञ्चारमाध्यमले वैद्य विहीबार कार्यक्रममा सहभागि हुँदा स्वास्थ्य विग्रिएर अस्पताल भर्ना भएको  लेखिएको  देख्यौँ तर त्यसमा सत्यता थिएन । उहाँ अस्पताल भर्ना भएको आज पन्ध्र दिन भयो । हिजो विहान अलि बढी समस्या भएर आसीयूमा सारिएको हो । अपरान्ह तिर सामान्य सुधार हो कि जस्तो छ,’ आइतबार  पारिवारिक स्रोतले भन्यो ।

उपचारमा सम्लग्न एक चिकित्सकका अनुसार उनको छातीमा संक्रमण र दमको समस्या छ । ‘निमोनिया नै त नभनौँ, छातीको संक्रमण हो । दम उहाँको पुरानो समस्या हो,’ ती चिकित्सकले भने,  ‘अहिले अवस्था स्थिर छ ।’

नेता वैद्य पहिले देखि नै दमका विरामी हुन् ।

अघिल्ला वर्षहरुमा पनि उनको समस्या बल्झिदा त्रिवि शिक्षण अस्पतालमा ल्याएर भर्ना गरी उपचार भएको थियो ।