काठमाडौँ, १० मंसिर । हिजो देखि काठमाडौँमा सुरु भएको ‘फोरम फर इथिकल रिभ्यु कमीटी इन द एशिया एण्ड वेस्टर्न प्यासिफिक रिजन (फरक्याप)को २४ औँ शिखर सम्मेलन औपचारिक उद्घाटन आज हुँदैछ ।

फरक्यापको सदस्य समेत रहेको नेपाल स्वास्थ्य अनुसन्धान परिषद्को मुख्य आयोजनामा द एभरेष्ट होटल नयाँ बानेश्वरमा सुरु सम्मेलनको औपचारिक उद्घाटन अहिले विहान स्वास्थ्य तथा जनसंख्या मन्त्री प्रदीप पौडेलले गर्ने भएका हुन् ।

‘उत्तरदायि अनुसन्धान ; अधिकतम लाभ’ (म्याक्सिमाइजिङ बेनिफिट थ्रु रेस्पोन्सिवल कन्डक्ट अफ रिसर्च) मुल नारा तय गरिएको यो सम्मेलनमा स्वदेश तथा विदेशबाट अनुसन्धान आचार संहिता विषयसँग सम्बद्ध विभिन्न विधाका विज्ञहरु, अनुसन्धानकर्ताहरु, नीति निर्माताहरु, प्राज्ञिक सस्थाका प्रतिनिधिहरु तथा विद्यार्थीहरु गरी ६ सय बढीको उपस्थिति रहेको छ ।

परिषद्का सदस्यसचिव डा प्रमोद जोशीले यस खालको सम्मेलन नेपालमै पहिलो पटक भएको बताए । उनले सम्मेलनमा विश्वका अमेरिका, जापान, बेलायत, फिलिपिन्स, पोल्याण्ड, मलेसिया, नर्वे, ग्रीस, केन्या, ब्राजिल, भारतलगायत २३ देशका सहभागीहरु प्रत्यक्ष तथा २०० भन्दा बढी सहभागीहरुले भर्चुअल सहभागिता जनाउने बताए ।

उनले कार्यक्रम भरी अनुसन्धान आचारसंहिताका विभिन्न पाटोहरुमा स्वदेशी तथा विदेशी अनुसन्धानकर्ताहरु बीच गहन छलफल, बहस तथा प्रस्तुतिकरण हुने जानकारी दिए ।

परिषद्का प्रमुख अनुसन्धान अधिकृत डा मेघनाथ धिमालले चार दिने सम्मेलनका लागि अनुसन्धान आचारसंहिताका विभिन्न विधामा प्राप्त भएका जम्मा ३०० वटा अब्स्ट्र्याक्ट मध्येबाट अन्तराष्ट्रिय अब्स्ट्र्याक्ट सेलेक्सन कमिटीबाट निर्धारित मापदण्ड अनुरुप रहेर ९० वटा मौखिक र १३ वटा पोस्टर प्रस्तुतिकरण छनोट गरिएको जानकारी दिए । सोमध्ये ६१ वटा प्रस्तुतिकरण अन्तर्राष्ट्रिय विज्ञहरुबाट हुने र २९ वटा प्रस्तुतिकरणहरु राष्ट्रिय विज्ञहरुद्धारा गरिने बताए ।

फरक्याप विश्व स्वास्थ्य संगठनको भगिनी संस्था हो । यसमा अनुसन्धान तथा इथिकल रिभ्युमा काम गर्ने संस्था तथा विज्ञहरुको आवद्धता रहेको छ ।