काठमाडौँ, १४ असोज । सरकारले जनलको उपचार निशुल्क बनाउने तयारी गरेको छ । स्वास्थ्य तथा जनसंख्या मन्त्रालय जलनको उपचार निशुल्क बनाउने तयारीमा जुटेको हो ।

नियुक्त भए लगत्तै सार्वजनिक गरेको योजना तथा प्राथमिकतामा स्वास्थ्य तथा जनसंख्या मन्त्री प्रदीप पौडेलले जलन सम्बन्धी उपचार निःशुल्क र सहज बनाउने योजना प्रस्तुत गरेका थिए ।

सोही अनुसार मन्त्रालयले जलन उपचार निःशुल्क बनाउन प्रक्रिया अघि बढाएको हो । मन्त्रालयले यससम्बन्धी प्रस्ताव अर्थ मन्त्रालयमा लगेकामा अर्थले हालै स्वीकृति दिएको मन्त्रालयका प्रवक्ता डा प्रकाश बुढाथोकीेले बताए ।

उनले मन्त्रालयले आफ्नै विद्यमान श्रोतबाटै व्यवस्थापन गर्ने गरी जलनको उपचार निःशुल्क बनाउनुका साथै सातै प्रदेशबाट उपचार थाल्ने गरी गृहकार्य गरिरहेको बताए ।

हाल कीर्तिपुर अस्पतालबाट उपचार भैरहेकामा गत महिनाबाट वीर अस्पतालमा पनि जलन उपचार सेवा सञ्चालनमा आएको छ । मन्त्रालयले सातैवटा प्रदेशमा यस्तो उपचार थाल्ने बताएको छ ।

कहाँ कहाँ सुरु हुँदैछ जलन उपचार सेवा ?

मन्त्रालयले कोशी प्रदेशमा बीपी कोइराला राष्ट्रिय स्वास्थ्य विज्ञान प्रतिष्ठान धरान तथा मधेस प्रदेशमा वीरगञ्जस्थित नारायणी अस्पतालमा जलनको उपचार सेवा सुरु गर्ने बताएको छ ।

यस्तै गण्डकी प्रदेशको पोखरास्थित पोखरा स्वास्थ्य विज्ञान प्रतिष्ठान, लुम्बिनीको नेपालगञ्जस्थित भेरी अस्पतालमा जलनको निःशुल्क उपचार गर्ने गरी तयारी गरिएको छ ।

यसैगरी, कर्णाली प्रदेशको सुर्खेत प्रादेशिक अस्पताल र सुदुरपश्चिमको धनगढीस्थित सेती प्रादेशिक अस्पतालमा जलनको निःशुल्क उपचार गर्ने गरी स्वास्थ्य तथा जनसंख्या मन्त्रालयले प्रक्रिया अघि बढाएको मन्त्री पौडेलको सचिवालयले जनाएको छ ।

‘सबैतिर उपचारको व्यवस्था नहुँदा धेरैले भोग्नुपरेको पीडा कसरी कम गर्न सकिन्छ भनेर मन्त्रीज्यूको निर्देशनअनुसार मन्त्रालयले तयारी थालेको छ’ मन्त्रालयका प्रवक्ता डा. बुढाथोकीले भने, ‘मन्त्रालयको आफ्नै श्रोतबाटै सातै प्रदेशमा निःशुल्क उपचार सुविधा दिने गरी तयारी अघि बढिरहेको छ ।’