नयाँ दिल्ली । एक जना ३१ बर्षीया महिला चिकित्सकको बलात्कार पछि हत्या भएपछि भारतमा चिकित्सकहरु आन्दोलित भएका छन् । उनीहरुले आज देखि देशव्यापी विरोध तथा ओपिडी तथा बैकल्पिक सेवाहरु बन्दको घोषणा गरेका छन् ।

गत ९ अगष्टमा कोलकत्ताको आरजी कर मेडिकल कलेज टिचिङ हस्पिटलमा पीजी तहमा अध्ययन्रत एक जना महिला चिकित्सकको बलात्कार पछि हत्या गरिएको थियो । त्यसको विरोधमा फेडरेसन अफ अल इन्डिया मेडिकल एसोसिएशनले देशव्यापी आन्दोलनको घोषणा गरेको हो ।

एसोसिएशनले भनेको छ, ‘हामी यो घटनाको बिरोध गरिरहेका पुरा भारतीय डाक्टरको साथमा छौँ । साथै देशभरका डाक्टरहरुलाई आजबाट यो विरोध कार्यक्रममा सहभागी हुन आव्हान गर्दछौँ । हामीलाई न्याय चाहिन्छ ।’

यसबीचमा इन्डियन मेडिकल एसोशिएसन (आईएमए)ले केन्द्रीय स्वास्थ्य मन्त्री जेपी नड्डालाई पत्र लेख्दै महिला चिकित्सक माथि भएको क्रुर घटनाको सम्वन्धमा तत्काल कार्वाही गर्न आग्रह गरेको छ । उसले यस विषयमा निष्पक्ष छानवीन गरी दोषीमाथि कार्वाह ीगर्न माग गरेको छ । यस्तै एसोसिएशनले यो पनि भनेको छ कि कस्तो परिस्थितिमा यो घटना भएको छ त्यसबारेमा पनि छानवीन होस ।

यस्तै आईएमएले कार्यस्थलमा चिकित्सकहरुको र त्यसमा पनि महिला चिकित्साको सुरक्षा बढाउन तथा सुरक्षा सम्वन्धी व्यवस्थामा सुधार ल्याउन समेत सरकारसंग माग गरेको छ ।

यता मृतक महिला डाक्टरको पोष्टमार्टम रिपोर्ट पनि आएको छ । सो रिपोर्टमा बलात्कार पछि घाटी अठ्याएर हत्या गरिएको उल्लेख छ । ९ अगष्ट विहान ३ देखि ५ बजेको समयमा यो घटना भएको बताइएको छ ।