काठमाडौँ, २१ असार । गर्मी संगै मनसुनको बेला छ । विशेषगरी तराई तथा पहाडी क्षेत्रमा यो समय सर्प देखिन्छन् । यहि सिजनमा सर्पले टोक्ने समस्या सर्पदंश पनि बढी हुने गरेको छ ।

कतिपय विषालु सर्पको डसाईले तथा आवश्यक सतकर्ता तथा सावधानी नपुग्दा मानिसहरुको ज्यानै जाने गरेको छ ।

सर्पले टोकिहाले के गर्ने ?

• डसेको ठाउँलाई चल्न नदिई स्थिर राख्ने ।
• सर्पले टोकेको ठाउँमा काट्ने, चुस्ने र बाध्ने आदि नगर्ने ।
• मलम रसायनिक पदार्थ, तातो चिसो प्रयोग नगर्ने ।
• सर्पको डसाईमा परेका व्यक्तिले आत्मविश्वास कायम राख्ने, त्यसका लागि बातावरण मिलाउने ।
• धामी झाँक्रीतिर नलाग्ने ।
• विष सोस्ने ढुंगाको पछि नलाग्ने ।
• सम्भव भएसम्म डस्ने सर्पको पहिचान गर्ने तर नमार्ने
• जति सक्दो चाँडो अस्पताल वा सर्प उपचार केन्द्रमा पुरयाउने ।

सर्पको टोकाईबाट जोगिन के गर्ने ?

• राती हिड्नु परे टर्च लाइट लिएर हिड्ने ।
• खुट्टा राम्ररी छोप्ने बाग्लो प्यान्ट लगाउने ।
• जुत्ता वा गमबुट लगाउने ।
• घर वरपरको घाँस, झारपात काटेर सफा राख्ने ।
• जमिनमा दुलाहरु टाल्ने ।
• पराल दाउरा आदि लिन जाँदा होसियारी अपनाउने ।
• सुत्नु अघि छोच्छ्यान, खाटमुनी र वरपर राम्ररी हेर्ने ।
• सधै झुल टाँगेर सुत्ने ।