काठमाडौँ, २३ जेठ । स्वास्थ्य तथा जनसंख्या मन्त्री प्रदीप यादव मंगलबार नेपाल मेडिसिटी अस्पतालको निरीक्षणमा निस्किएका छन् । काठमाडौँका केही ठूला सरकारी अस्पतालको निरीक्षण पछि उनी ठूलो लगानीको निजी अस्पतालको निरीक्षणमा निस्किएका हुन् ।

भ्रमणको क्रममा उनले यस अस्पतालले प्रदान गर्दै आएको उपचार सेवा, गुणस्तर सरसफाईका साथसाथै सरकारको स्वास्थ्य कार्यक्रमबारे जानकारी लिएका छन् । सो क्रममा उनले अस्पतालको हेलिप्याड, आइसियु, अपरेशन थिएटर, डायलासिस् तथा ग्यास्ट्रो विभागको अवलोकन गरे ।

त्यसो त मेडिसिटीमा पाँच वर्षदेखि अस्पतालले विपन्न नागरिक औषधि उपचार योजना लागू गर्दै आएको छ । यसबाट झण्डै दुई हजार मानिसहरुले उपचार सेवा प्राप्त गरेको अस्पतालले जनाएको छ । त्यस अन्तर्गत हालसम्म ३०४ जनाले मुटु सम्बन्धि उपचार तथा शल्यक्रिया गरेका छन् भने, १५४३ जनाले क्यान्सर सम्बन्धि र १४६ जनाले डाइलासिस् सेवा लिएका छन् ।

अवलोकनको क्रममा स्वास्थ्य मन्त्री यादवले अस्पतालहरुको वर्गीकरण, मेडिकल टुरिजम तथा अस्पतालमा हुनुपर्ने सेवा सुविधाको विषयमा छलफल गरेका छन् ।

हजारौं संख्यामा नेपालीहरु उपचारका लागि विदेशीनुपर्ने बाध्यताको विषय उठान गर्दै नेपाल मेडिसिटीका अध्ययक्ष डा. उपेन्द्र महतोले नेपालका अस्पतालहरुलाई नै अन्र्तराष्ट्रिय स्तरको सेवा सम्पन्न बनाउन सके नेपाल मेडिकल टुरिजमको हब बन्न सक्ने बताए ।

सो क्रममा क्रममा अस्पतालले सहज रुपमा औषधी उपलब्ध हुुनुपर्ने, औषधी आयात प्रक्रियालाई औषधी व्यवस्था विभागका झन्झटिला प्रक्रियालाई सहजिकरण गर्नुपर्ने, क्यान्सर रोगका लागि आवश्यक साइक्लोेट्रोन नेपालमै उत्पादन हुनुपर्ने तथा अन्र्तराष्ट्रिय स्तरको अस्पताल बनाउन विदेशी दक्ष चिकित्सकहरुलाई पनि छोटो समयका लागि नेपालमा काम गर्ने अनुमति दिइनुपर्ने जस्ता विषयमा छलफल गरेको बताइएको छ ।