काठमाडौँ, १५ जेठ । प्रधानमन्त्री पुष्पकमल दाहाल (प्रचण्ड) पत्नी स्वर्गीय सीता दाहालको नाममा कलेज स्थापना हुने भएको छ । अर्थमन्त्री बर्षमान पुनले आज प्रस्तुत गरेको आर्थिक बर्ष २०८१ /०८२ को बजेट बक्तव्यमा सो जानकारी दिएका हुन् ।

‘काठमाडौं विश्वविद्यालयमा सीता दाहाल मेमोरियल कलेज अफ नेचुरोपेथि एण्ड यौगिक साइन्स कलेज स्थापना र पूर्वाधार निर्माणका लागि रकम व्यवस्था गरेको छु,’अर्थमन्त्री पुनले संसदको संयुक्त बैठकमा बजेट प्रस्तुत गर्ने क्रममा भने ।

प्रचण्ड पत्नी दाहालको गतवर्ष अर्थात २७ असार २०८० का दिन निधन भएको थियो । पार्किन्सन जस्तो देखिने एक जटिल प्रकारको रोग ‘प्रोग्रेसिभ सुपरान्युक्लियर पाल्सी (पीएसपी)’ बाट पीडित दाहाल लामो समयदेखि ओछ्यान परेकी थिइन् । तर उनको निधन भने हृदयघात भएको थियो ।

अर्थमन्त्री पुनले सीता दाहालको नाममा कलेज स्थापना गर्ने बजेट बक्तव्य प्रस्तुत गरिरहँदा संसदमा रहेका प्रधानमन्त्री प्रचण्डको मुहार प्रफुल्लित देखिन्थ्यो ।