काठमाडौँ, २८ असोज ।  सामाजिक क्षेत्रमा विशिष्ठ योगदान पुर्‍याएको भन्दै अभिवादन बहुउद्देश्यीय सहकारी संस्था लिमिटेडेले नेपाल स्वयंसेवी रक्तदाता समाजका अध्यक्ष एवं सतक रक्तदाता प्रेम सागर कमाचार्यलाई नगद सहित सम्मान गरेको छ ।

सहकारीको शनिबार सम्पन्न सातौँ बार्षिक साधारण सभाको अवसरमा कर्माचार्यलाई रक्तदानका क्षेत्रमा विशिष्ट योगदान पुर्‍याएको भन्दै २५ हजार रुपैयाँ सहित सम्मान गरिएको हो ।

त्यसो त सहकारीले यसवर्ष देखि सामाजिक क्षेत्रमा विशिष्ठ योगदान पुर्‍याउने व्यक्तिलाई सम्मान गर्न थालेको हो । त्यसैले कर्माचार्य यो सहकारीबाट सम्मानित हुने पहिलो व्यक्ति बनेका छन् ।

शनिबार आयोजित कार्यक्रममा सहकारीका संस्थापक अध्यक्ष किशोर महर्जनले २५ हजार रुपैयाँको चेक सहित दोसल्ला ओडाई सम्मान गरेका हुन् ।

सम्मान पछि कर्माचार्यले आफूलाई प्रदान गरेको उक्त धनराशि नेपाल स्वयंसेवी रक्तदाता समाजको रक्तदाता उत्प्रेरणा गतिविधिमा प्रयोग गर्नेगरि संस्थालाई प्रदान गर्ने घोषणा गरे ।