काठमाडौँ, १२ भदौ । नेपालमा अब फेसबुक र इन्स्टाग्राममा मदिराजन्य पदार्थका विज्ञापनहरु देख्न नपाइने भएको छ । फेसबुक र इन्स्टाग्रामको मुख्य सञ्चालक मेटाले आज सूचना जारी गर्दै मदिराजन्य पदार्थका विज्ञापनमा रोक लगाइएको जनाएको हो ।

उसले सूचनामा नेपाल सहित १८ वटा देशमा त्यहाँको कानूनले मदिराजन्य पदार्थको विज्ञापन सामाजिक सञ्जालमा गर्न निषेध गरेको उल्लेख गर्दै त्यसको पालना आफुहरुले गरेको बताएको छ ।

मेटाले दक्षिण पूर्वी एसियाका देशहरुमध्ये नेपालसहित अफगानिस्तान, बंगलादेश, भारतका निश्चित प्रान्तहरु, थाइल्याण्ड र पाकिस्तानमा मदिराजन्य विज्ञापनहरु आफ्नो सोसल मिडिया प्लेटफर्महरुमा रोक लगाएको हो । यस्तै, ब्रुनाई, इजिप्ट, जिम्बाबे, कुवेत, लिबिया, लिथुनिया, नर्वे, रसिया, साउदी अरब, टर्की र युएई र यमनमा पनि मदिराजन्य विज्ञापनमा रोक लगाएको छ ।

त्यसो त गत ११ फागुनमा सर्बोच्च अदालतले नेपालमा मदिराजन्य पदार्थको सार्वजनिक विज्ञापन गर्न नपाउने आदेश दिएको थियो । उक्त आदेशलाई सम्मान गर्दै मेटाले नेपालभित्र संचालित फेसबुक र इस्टाग्रामका एकाउण्टमा मदिराजन्य विज्ञापन गर्न र हेर्न नपाइने व्यवस्था गरेको हो ।

उपभोक्ता हित संरक्षण मञ्चका ज्योति बानियाले फेसबुक र इन्स्ट्राग्रामले गरेको निर्णय प्रति खुशी व्यक्त गरेका छन् । मञ्चले पत्रपत्रिका तथा अनलाइन तथा सामाजिक सञ्जालमा मदिराजन्य पदार्थका विज्ञापन रोक्न माग गर्दै सर्बोच्चमा रिट दायर गरेको थियो ।

उक्त रिटमा सर्बोच्चले आदेश जारी गर्दै नेपालमा पत्रपत्रिका तथा अनलाइन र सामाजिक सञ्जालतमा मदिराजन्य पदार्थको विज्ञापन गर्न नपाइने आदेश जारी गरेको थियो ।