काठमाडौँ । प्रश्न पत्र ‘आउट’ भएपछि नेपाल नर्सिङ काउन्सिलले आज लिएको लाइसेन्स परीक्षाको नतिजा स्थगित गरेको छ । काउन्सिलले केही वेर अघि सूचना प्रकाशित गर्दै विशेष कारणवस नतिजा प्रकाशन स्थगित भएको जनाएको छ ।

काउन्सिलले आज लिएको ३३ औँ नाम दर्ता (लाइसेन्स) परीक्षामा सिद्धार्थ बनस्थलि मावि बनस्थली सेन्टरबाट प्रश्नपत्र आउट भएको हो । त्यस सेन्टरमा सहभागी तीन जना परीक्षार्थीहरुले प्रश्न पत्र फोटो खिचेर बाहिर पठाएका थिए ।

बालाजु प्रहरीले प्रश्न पत्र बाहिर पठाउने तीन जनालाई नियन्त्रणमा लिएको छ । ‘फोटो खिचेर बाहिर पठाउने र सामाजिक सञ्जालमा हाल्ने काम गरेको अभियोगमा तीन जनालाई नियन्त्रणमा लिएका छौँ,’ बालाजु प्रहरी स्रोतले भन्यो ।

स्रोतका अनुसार उनीहरुले प्रश्नपत्र बाहिर पठाउने र बाहिरबाट उत्तर लेखेर भित्र पास गर्ने प्रयास गरेका थिए ।

प्रहरीले परीक्षार्थी पक्राउ गरेपछि काउन्सिलको आकस्मिक बैठक बसेर परीक्षाफल स्थगित गरेको हो ।