काठमाडौँ, ५ माघ । स्वास्थ्य मन्त्री पदम गिरीले बिराटनगरस्थित कोशी अस्पतालको आकस्मिक कक्षबाट जिवित शिशुलाई मृत्यु भएको भन्दै उपचार नगरी फर्काइएको घटनाको विषयमा अस्पताल प्रशासनसंग जानकारी लिएका छन् ।

उनले घटनाको विषयमा अस्पताल प्रशासनले चालेको कदमलाई सकारात्मक भन्दै त्यसलाई निस्कर्षमा पुर्‍याई भविस्यमा यस्ता खालका गल्ती नहुने गरी काम गर्न निर्देशन दिएका छन् ।

घटनाको विषयमा जानकारी दिन अस्पतालका निमित्त मेडिकल सुपरीटेन्डन डा लक्ष्मीनारायण यादव बिहीबार अपरान्ह स्वास्थ्य मन्त्रालय आएका थिए । उनले घटनाको विषयमा जानकारी गराउँदै अस्पताल छानविन अघि बढाएको र प्रतिवेदन नआउँदासम्म आरोपितहरुलाई तत्काल काम काज गर्न रोक लगाएको जानकारी गराएका थिए ।

बुधबार विहानकोशी अस्पतालको आकस्मिक कक्षमा उपचारका लागि लगेको १८ दिनेलाई शिशुलाई सास नरहेको र धड्कन बन्द भएको भन्दै डा आकाश यादव सहितको टोलीले मृत घोषणा गर्दै फर्काएको थियो । सो टोलीमा अहेब लक्ष्मण माझी र टिका भण्डारी थिए ।

स्वास्थ्य सचिव डा रोशन पोखरेलले बुधबारको घटनाको विषयमा अस्पतालले चालेको कदमलाई प्रभावकारी ढंगले अघि बढाउन मन्त्री गिरीले निर्देशन दिएको बताए । ‘कोशीका निमित्त मेसुले घटना र त्यसपछिका कदका बारेमा ब्रिफिङ गर्नु भयो । मन्त्री ज्यूले पनि अस्पताल प्रशासनले अहिले जसरी छानविन समिति गठन गरि छानविन समेत सुरु गरिसकेको छ, यो ठीक छ । त्यसले कस्तो प्रतिवेदन दिन्छ । त्यसलाई हेरेर मन्त्रालयले आवश्यक परेमा थप कदम अघि बढाउँन पनि सक्छ भन्नु भएको छ । अहिलेलाई अस्पतालले गरेकै कामलाई नजिकबाट निहालेको छौँ भन्नुभयो,’ डा. पोखरेलले भने ।

अस्पतालले बिहीबार नै बालरोग विशेषज्ञ डा. प्रविण झाको नेतृत्वको तीन सदस्यीय छानविन समिति गठन गरेको छ । समितिमा बालरोग विशेषज्ञ डा सूर्यकान्त चौधरी र शाखा अधिकृत रामप्रसाद नेपाललाई सदस्य सचिव बनाइएको छ ।

समितिलाई सात दिन भित्र छानविन प्रतिवेदन बुझाउन निर्देशन दिइएको अस्पतालका निमित्त मेडिकल सुपरीटेन्डेन्ड लक्ष्मीनारायण यादवले जानकारी दिए । छानविनबाट चिकित्सक र स्वास्थ्यकर्मीको लापरवाही देखिए कारवाही गरिने उनले बताए ।

घटना के थियो ?

बुधबार विहान साढे ८ बजे मोरङको जहदा गाउँपालिका ३ का १८ दिने नवजात शिशुलाई श्वासप्रश्वासमा समस्या भएपछि पिता दिलीप मुखिया र आमा उमा मुखियाले कोशी अस्पताल लिएर आएका थिए । त्यसबेला अस्पतालको आकस्मिक कक्षमाडा. यादव र अहेबद्वय माझी र अधिकारीको ड्युटी रहेको थियो । उनीहरुको डिउटी विहान ८ बजेदेखि दिउँसो २ बजेसम्म थियो ।

डाक्टर आकाश यादवले राम्रोसँग शिशुको उपचार श्वास छैन, धड्कन चल्न छाडिसक्यो, घर लैजानु भन्दै मृत घोषणा गरेका थिए । परिवारले अस्पतालबाट फर्काई  दाहसंस्कारको तयारी चल्दै गर्दा शिशुका हातगोडा चलमलाए पछि यो घटना बाहिर आएको हो । शिशुका परिवार तथा आफन्तले जिवित शिशुलाई उपचार नै नगरी मृत्यु घोषणा गरेको भन्दै आक्रोशित भएका थिए ।

बुधबार अस्पताल दिनभरी तनाबग्रस्त बनेको थियो ।

मृत घोषणा गरिएको सो शिशुको अहिले विराटनगरस्थित गोल्डेन अस्पतालको एनआइसियूमा राखेर उपचार भइरहेको छ । गोल्डेन अस्पतालले शिशुको स्वास्थ्य अवस्थामा सुधार भएको जनाएको छ ।