काठमाडौँ, १८ माघ । दुई साता अघि स्वास्थ्य तथा जनसंख्या मन्त्रालयबाट अवकाश लिएका प्रमुख विशेषज्ञ डा भीम सिंह तिकंरीको कलेजो प्रत्यारोपण सफल भएको छ । भारतको नयाँदिल्लीस्थित म्याक्स अस्पतालमा उनको कलेजो प्रत्यारोपण गरिएको हो । डा तिंकरीलाई आफ्नै छोरा देवाशिषले कलेजो दान गरेका हुन् ।

डा तिंकरी पछिल्लो एक वर्ष देखि अस्वस्थ थिए । पछिल्लो केही महिना त उनी त्रिवि शिक्षण अस्पतालमा भर्ना भएर कलेजोको उपचार समेत गराएका थिए । शिक्षण अस्पतालका चिकित्सकहरुले पनि उनको कलेजो प्रत्यारोपण गर्नुपर्ने बताएका थिए ।

डा तिंकरीले केहीवेर अघि फेसबुकमा आफ्नो स्वास्थ्य उपचारबारे जानकारी दिदै कलेजो प्रत्यारोपण गरेको उल्लेख गरेका छन् । दिल्लीस्थित म्याक्स अस्पतालका प्रमुख कलेजो प्रत्यारोपणविज्ञ डा सुभाष गुप्ताको टोलीले प्रत्यारोपण गरेको छोराले आफूलाई कलेजो दान दिएको उल्लेख गरेका छन् ।

डा तिंकरी गत २ माघ देखि सरकारी सेवाबाट अनिवार्य अवकाश पाएका थिए ।