काठमाडौँ, २५ भदौ । विष सेवन पछि उपचार कै क्रममा मृत्यु भएकी ७० बर्षीया महिलामा कोरोना संक्रमण भएको पुष्टि भएको छ । चावहिलस्थित हेल्पिङ ह्याण्ड्स अस्पतालमा बुधबार राती मृत्यु भएकी ७० बर्षीया महिलामा कोरोना पुष्टि भएको छ ।

काठमाडौँ हाँडीगाँउकी ती महिला महिलाले गत २२ भदौमा विष सेवन गरेपछि परिवारले हेल्पिङ ह्याण्ड्स सामुदायिक अस्पतालमा उपचारका लागि ल्याएको थियो ।

‘ शुरुमा आइसोलेसन वार्डमा राखेर उपचार गर्दा लक्षण देखिएपछि पीसीआर परीक्षण गरिएको थियो । र रिपोर्ट पोजेटिभ आयो र उहाँको हिजो बेलुका ८ बजे उपचारकै क्रममा मृत्यु भयो,’ अस्पताल स्रोतले भन्यो ।

अस्पतालले अहिले भर्ना गर्नु पर्ने बिरामीलाई शुरुमा आइसोलेसनमा राख्ने र आवश्यकता अनुसार वार्डमा सिफ्ट गर्ने गर्दछ ।
हेल्पिङ ह्याण्ड्स अस्पतालले आफूकहाँ कोरोनाबाट मृत्यु भएको यो पहिलो केश भएको बताएको छ ।