काठमाडौँ, ३० जेठ ।

काठमाडौँ, ३० जेठ । पछिल्लो चौविस घण्टामा देशका विभिन्न जिल्लामा गरी थप ४४८ जनामा कोरोना संक्रमण देखिएको छ । स्वास्थ्य तथा जनसंख्या मन्त्रालयले आज गरेको नियमित कोरोना ब्रिफिङ मा प्रवक्ता डा जागेश्वर गौतमले ४२४ पुरुष र २४ महिला गरी ४४८ जनामा कोरोना संक्रमण देखिएको बताए ।

यो संख्या नेपालमा कोरोना देखिए यता एकैदिन संक्रमण भएको सबैभन्दा बढी हो ।

नयाँ संक्रमितहरु मोरङ, झापा, महोत्तरी, चितवन, धादिङ, इलाम, सुनसरी, पर्वत, स्याङजा, पूर्वी नवलपरासी, तनहुँ, बर्दिया, बाँके, धनुषा, सर्लाही, दाङ, दैलेख, सुर्खेत, अर्घाखाँची, पाल्पा, प्युठान, रुपन्देही, बारा, नुवाकोट, रौँतहट, काठमाडौँ सहितका जिल्लाका हुन् ।

आज थपिएका संक्रमितहरुको संख्या सहित नेपालमा कोरोना संक्रमितहरुको संख्या ५ हजार ६२ पुगेको छ । त्यसमा ४७०९ पुरुष र ३५३ जना महिला रहेका छन् ।

डा गौतमले पछिल्लो चौविस घण्टामा १६ जना डिस्चार्ज भएको जानकारी दिए । यो संगै कोरोना परास्त गरी अस्पतालबाट डिस्चार्ज हुनेको संख्या ८७७ पुगेको छ । कोरोनाबाट आजसम्म मृत्यु हुनेको संख्या १६ पुगेको छ ।