काठमाडौँ, ४ असोज ।  उपचारका क्रममा लापरबाही भएर बिरामीको मृत्यु भएमा चिकित्सकले क्षतिपूर्ति तिर्नुपर्ने नियम बनाउन मन्त्रिपरिषदले गरेको निर्णयको विरोधमा चिकित्सक संघले आन्दोलनको घोषणा गरेको छ ।

संघले तत्काल निर्णय फिर्ता नलिए आगामी शुक्रबारदेखि देशभरका  अस्पताल तथा स्वास्थ्य संस्थाका  ( आकस्मिक बाहेकका सबै सेवा) बन्द गर्ने घोषणा गरेको छ । बुधबार बसेको नेपाल चिकित्सक संघको बैठकले यस्तो निर्णय गरेको हो ।

बैठक पछि संघका महासचिव डा लोचन कार्कीद्धारा जारी विज्ञप्तीमा गत सोमबारको मन्त्रिपरिषद बैठकले गरेको निर्णय प्रति खेद व्यक्त गर्दै आन्दोलनको कार्यक्रम सार्वजनिक गरेको हो ।

हेरौँ विज्ञप्ती

नेपाल चिकित्सक संघ केन्द्रीय कार्यालयमा आज बसेको संघको बृहत बैठकमा उपस्थित हुनु भएका विभिन्न विशेषज्ञ समाजका अध्यक्ष तथा महासचिवहरु, अस्पताल र मेडिकल तथा डेण्टल कलेजका निर्देशक तथा संचालकहरु, संघका पूर्व अध्यक्ष, पूर्व महासचिव र संघका बरिष्ठ सदस्यहरुको भेलाले गरेको व्यापक छलफलको निर्णय बमोजिम मन्त्रीपरिषद्को मिति २०७४ आश्विन २ गते बसेको बैठकले चिकित्सकहरुलाई लक्षित गरी गरेको निर्णयको घोर भत्र्सना र निन्दा गर्दछ ।

आजको यस बैठकले निम्न लिखित मागहरुको सम्बोधन नभएमा यहि २०७४ आश्विन ६ गतेदेखि लागू हुने गरी देशभरका सम्पूर्ण अस्पताल, मेडिकल तथा डेन्टल कलेज, नर्सिङहोम, क्लिनिक लगायतका सम्पूर्ण स्वास्थ्य संस्थाहरुमा आकस्मिक बाहेकका अन्य सम्पूर्ण स्वास्थ्य सेवा पूर्णरुपमा बन्द गर्ने निर्णय गरिएको छ । यसको यथोचित कार्यान्वयनका लागि संघका सम्पूर्ण शाखा कार्यालयहरु, नेपाल भरीका सम्पूर्ण स्वास्थ्यसंस्था, चिकित्सक तथा स्वास्थ्यकर्मीहरुलाई यसै विज्ञप्ती मार्फत तयारी अवस्थामा रहन समेत सूचित गरिन्छ ।