काठमाडौँ, ३१ भदौ । गत २३ भदौ देखि शुरु भएको नेपाल मेडिकल काउन्सिलको निर्वाचन  आज सकिएको छ ।

प्रारम्भिक विवरण अनुसार उपत्यकाका दुई मतदान केन्द्रमा तीन दिनसम्म भएको मतदान प्रक्रियामा ३ हजार ५१३ भोट खसेको छ ।  गत २३ भदौमै सम्पन्न उपत्यका बाहिरको १६ वटा मतदान केन्द्रमा भने ३ हजार ५६२ भोट खसेको थियो ।

नेपाल मेडिकल काउन्सिलका प्रवक्ता डा. कृष्ण अधिकारीले निर्वाचन शान्तिपूर्ण रुपमा सम्पन्न भएको जानकारी दिदै मतगणना भोलि विहान ९ बजे देखि स्थानीय विकास प्रशिक्षण प्रतिष्ठान जाउलाखेलमा शुरु हुने बताए ।
मतदानमा चिकित्सकको उत्साहमा कमी ?

काउन्सिलको अघिल्ला निर्वाचनमा भन्दा यसपटक मतदाताको उत्साहमा कमि आएको पाइयो । २० हजार बढी लाइसेन्स प्राप्त चिकित्सकले भोट हाल्न पाउने भएपनि प्रारम्भिक नतिजाले ३५ प्रतिशतको हाराहारीमा भोट खसेको देखाएको छ ।

मतदातामा मात्रै होइन अघिल्ला चुनावको तुलनामा यसपटक उम्मेदवारीको रौनक पनि घटेको पाइएको छ ।  अघिल्ला चुनावमा ४० ४५ जनाको उम्मेदवारी पर्ने गरेकोमा यसपटक कुल २७ जनाले उम्मेदवारी दिएका थिए ।

उपत्यका बाहिर भन्दा उपत्यकामा दुई गुना बढि चिकित्सक भएको अनुमान गरिएपनि मतदान गर्ने बेलामा बाहिर भन्दा कमी देखिएको छ ।