चितवन, २५ भदौ । भरतपुर अस्पतालमा प्रसूतिका लागि आउने बिरामीमध्ये झण्डै आधा भुइँमा नै सुतेर प्रसूति गराउन बाध्य छन् ।
अस्पतालका प्रसूति रोग विभाग प्रमुख डा सुनिलमणि पोख्रेल अस्पतालमा प्रसूति गराउन आउने आधाआधि महिला भूइँमा सुतेर उपचार गर्न बाध्य भएको बताउछन् । दैनिक सरदर ४० जना भूइँमा नै हुने गरेको उनले बताए । भरतपुर महानगरपालिकामा प्रमुख र उपप्रमुख दुवै महिला छन् ।

महानगरमा प्रमुख र उपप्रमुखको शपथपछिको ३२ औँ दिनका दिन आज दोस्रो पटक भरतपुर अस्पताल पुग्नुभएका उनीहरुले प्रसूति गृहको निरीक्षण गरेका थिए । महानगर प्रम
ख रेणु दाहाल र उपप्रमुख पार्वती शाह जब प्रसूति गृह पसे, भुइँभरी प्रसव अवस्थाका गर्भवती महिला देखे । त्यसो त शपथका दिन पहिलो निर्णय नै उनीहरुले महिला र वृद्धका लागि अस्पतालमा बहिरङ्ग टिकट निःशुल्क गराउछौँ भनेका थिए ।

श्ययाको अभावमा कष्टकर अवस्था देखेपछि प्रमुख दाहालले आउँदा दिनमा सो अवस्था नरहने गरी काम गर्न अस्पताल प्रशासनलाई निर्देशन दिइन । उनले भनिन्, “सक्दो सहयोग महानगरले गर्छ, आवश्यक पहल केन्द्रमा पनि गर्छु, तपाईँ झै अब महिलाले भुइँमा सुतेर उपचार गर्नुपर्दैन ।” उनले अस्पतालका स्रोत साधनलाई अधिकतम उपयोग गरी बिरामीको उपचारमा लाग्न निर्देशन पनि दिइन । उपप्रमुख ठकुरीले पनि महानगरभित्रै महिलाले कष्टपूर्ण ढंगले प्रसूति सेवा लिन नपर्ने गरी काम गर्नुपर्ने बताइन ।

अस्पतालको प्रसूति गृहमा एक सय १० श्यया छन् । अस्पतालका मेडिकल सुपरिटेण्डेण्ट डा रुद्र मरासिनीले वार्षिक रुपमा १४ हजारभन्दा बढी महिलाले अस्पतालबाट प्रसूति सेवा लिने गरेको बताए । उनले राजधानीको प्रसूति गृहपछि नेपालमा सबैभन्दा बढी प्रसूति गराउने अस्पताल भरतपुर अस्पताल रहेको जनाए । अस्पतालमा आठ प्रसूति रोग विशेषज्ञ छन् ।

अस्पतालको निरीक्षणमा आएका जनप्रतिनिधिसंग मेसु डा मरासिनीले कम्तीमा ५० श्ययाको प्रसूतिरोग विभाग जरुरत रहेको बताए । । त्यसैगरी जनशक्ति अभाव रहेको, आकस्मिक कक्ष साँघुरो भएको बताउँदै एमआरआई, क्याथल्याब र मानव अंग प्रत्यारोपणका लागि आवश्यक उपकरण व्यवस्था गर्नुपर्ने माग गरे ।

वर्षातको समयमा पानी जमेर अस्पताल अस्तव्यस्त हुने हुँदा ढलका लागि पनि पहल गरिदिन समेत उनले जनप्रतिनिधीसंग आग्रह गरे । भरतपुर अस्पतालमा चितवन र छिमेकी जिल्लाबाट वर्षमा दुई लाख भन्दा बढीले उपचार सेवा लिँदै आएका छन् । रासस