बागलुङ, ४ असार । आर्थिक अभावले उपचारमा समस्या झेलिरहेकी बागलुङ नगरपालिका–७ की धनमायाँ विकलाई आर्थिक सहयोग प्राप्त भएको छ ।

रक्त क्यान्सरबाट ग्रस्त विकलाई बागलुङबाट दक्षिण कोरिया पुगेका केही व्यक्तिले उठाएको रु १५ हजार आइतबार प्रदान गरिएको हो । सहयोग जुटाउन पहल लिएका सज्जनकुमारसिंह र पत्रकार महासङ्घ बागलुङ शाखाका अध्यक्ष दिल शिरीषले सो रकम हस्तान्तरण गरे ।

सहयोग रकम बुझ्दै विकका श्रीमान् हिमलाल विकले उपचारमा रकम अपुग भएकाले सहयोगको याचना गरेको बताए। अन्य मुलुकमा रहेका नेपालीबाट पनि सहयोग प्राप्त भएको उनको भनाइ छ ।

“कतिपय ठाउँबाट प्रतिबद्धता आए पनि रकम आएको छैन” विकले भने – “हाम्रो दुःखमा साथ दिने सबैलाई धन्यवाद छ ।” गत वर्षदेखि रक्त क्यान्सरले थलिएकी विक अहिले काठमाडौँस्थित शिक्षण अस्पतालमा उपचाररत छन् । उनको उपचारमा रु २० लाखभन्दा बढी खर्च लाग्ने चिकित्सकले बताएको विकका आफन्त रमेश सेञ्चुरीले बताए ।

ऋणधन र प्राप्त केही सहयोगबाट हालसम्म रु १५ लाखभन्दा बढी रकम उपचारमा खर्च भइसकेको जनाइएको छ । नियमित उपचारको खर्च र पहिले लागेको ऋण कसरी तिर्ने भन्ने पिरलोमा विक परिवार छ ।

विक दम्पतीका चार छोरीमध्ये कान्छी छोरी पूर्णिमा विकलाई पनि मिर्गौलामा समस्या देखिएपछि उपचारमा समस्या भएको छ । आमा बिरामी परेर उपचारमा गएपछि सात वर्षीय छोरा प्रतीक घरमै दिदीहरूको सहारामा हुर्किरहेका छन् । रासस