काठमाडौँ, २९ बैशाख । निजी अस्पतालहरुले नर्स भोलेन्टियर राखे भन्ने आरोप लागि रहेका बेला सरकारी अस्पतालले समेत ठूलो संख्यामा भोलेन्टियर नर्स राखि श्रम शोषण गरेको पाइएको छ । पोखरास्थित पश्चिमाञ्चल क्षेत्रीय अस्पतालले एक सय भन्दा बढी नर्स भोलेन्टियरमा राखेर सित्तैमा काम गराएको हो ।

अन्तराष्ट्रिय नर्सिङ दिवसको अवसरमा शुक्रबार आयोजित कार्यक्रममा नेपाल नर्सिङ संघकी अध्यक्ष तारा पोखरेलले सो कुरा बताएकी हुन् । उनले भनिन्, हामीलाई लाग्थ्यो भोलेन्टियर निजी क्षेत्रमा मात्रै हो सरकारीमा छैन होला भन्ने तर पश्चिमाञ्चल क्षेत्रीय अस्पताल पोखरामा एक सय भन्दा बढी नर्सलाई भोलेन्टियर राखेको पाइयो ।

उनले भोलेन्टियर राखेको थाह पाएपछि मेसु डा श्रीकृष्ण श्रेष्ठको ध्यानाकर्षण गराएपनि उनले आफूहरुसंग दरबन्दी कम भएको र भर्खरै पास गरेकाहरुले अनुभवका लागि आउन चाहेपछि भोलेन्टियर राखेको जवाफ दिएको बताइन । यस बारेमा डा श्रेष्ठसंग सम्पर्क गर्ने प्रयास सफल हुन सकेन ।

अध्यक्ष पोखरेल नर्सिङ दिवस मनाई रहँदा नर्सको हक अधिकारको कुरा आउने भन्दै त्यसमा सरकार र जिम्मेबार निकायहरु गम्भीर नभएको जनाइन् । ‘न तलव राम्रोसंग दिएको छ, विरामी नर्स रेसियो मिलाएको छ । न त लवबी रुपमा राख्नैपर्ने नियम कार्यान्वयनमा ल्याएको छ ।आजको दिनमा नर्सिङ पेशामा लागेर विरामीको सेवा गर्दा हुने अनुभूति बाहेक नर्सका लागि केही पनि छैन्’ पोखरेलले भनिन् ।

उनले नर्सिङ क्षेत्र सुधारका लागि स्वास्थ्य मन्त्री गगन थापाले गठन गरेको समिति र त्यसले दिएको प्रतिवेदनमा पनि आपत्ती जनाईन् ।
‘त्यो समितिको कामै छैन न त त्यसले दिएको रिपोर्ट काम लाग्दो छ । मन्त्री ज्यूले समस्या समाधान गर्न भन्दा पनि सस्तो लोकप्रियता हासिल गर्ने मनसायले आफ्ना निकट केही व्यक्तिलाई राखेर गरेको समितिको केही तुक छैन । यसले समस्या समाधान गर्दैन्,’ पोखरेलले भनिन् ।

उनले २० हजार चिकित्सकका लागि मन्त्रालयमा छुट्टै महाशाखा छ तर ७१ हजार बढी नर्सका लागि एउटा महाशाखा नभएको भन्दै आपत्ति जनाईन् ।