काठमाडौँ, ३० चैत । स्वास्थ्य तथा वैज्ञानिकहरुको तेस्रो शिखर सम्मेलनमा उत्कृष्ठ अनुसन्धान कार्यपत्र प्रस्तुत गर्ने ६जना अनुसन्धानकर्ता पुरस्कृत भएका छन् । त्यसरी पुरस्कृत हुनेहरुमा तीन जना चिकित्सक छन् ।

पुरस्कृतमध्ये तीन जनाले मौखिक अनुसन्धानमुलक कार्यपत्र प्रस्तुत गरेका थिए भने बाँकी तीन जना पोष्टर प्रतिस्पर्धाबाट छानिएका हुन् ।
पुरस्कृत हुनेहरुमा मौखिक तर्फ प्रथम डा प्रज्ञा गड्तौला मेरिस्टोप नेपाल, दोस्रो डा प्रनिलमान सिंह प्रधान र तेस्रो डा गम्भीर श्रेष्ठ रहेका छन् ।

उनीहरु क्रमश त्रिवि चिकित्साशास्त्र अध्ययन संस्थान त्रिवि शिक्षण अस्पताल र वीपी कोइराला स्वास्थ्य विज्ञान प्रतिष्ठान धरानमा कार्यरत हुन् ।
सो सम्मेलनमा पोष्टर प्रतिस्पर्धा पनि राखिएको थियो । जसमा प्रथमस्थान श्रद्धा आचार्यले हात पारिन । दोस्रो रुवी थापा र तेस्रो पुरस्कार सृजन आचार्यको पोल्टामा परयो । पुरस्कृत आचार्यद्धय आईओएमका हुन भने थापा आनन्दबन हस्पिटलमा कार्यरत छिन् ।

नेपाल स्वास्थ्य अनुसन्धान परिषदको आयोजनामा गत सोमबारबाट भएकोे शिखर सम्मेलनमा स्वदेश तथा विदेशका गरी करीव १ हजार बढीको सहभागीता भएको थियो । सो सम्मेलनमा ६८ वटा मौखिक र १२८ वटा पोष्टर प्रस्तुति गरिएका थिए ।

सम्मेलनको नारा ‘दिगो विकास लक्ष्यमा स्वास्थ्य : के हामी सहि मार्गमा छौ ?’ भन्ने थियो ।