काठमाडौँ, २७ असार –  प्लसटू लेभलको प्रमाणपत्र नक्कली बनाई एमबीबीएस पढेको आरोपमा धेरै डाक्टरहरु पक्राउ परे । तर एक जना डाक्टरको भने एमबीबीएसको प्रमाणपत्र नै नक्कली भएको फेला परेको छ ।

भारतको बनारस हिन्दु विश्वविद्यालयबाट सन् १९९९ मा एमबीबीएस पास गरेको प्रमाणपत्र पेश गरि नेपाल मेडिकल काउन्सिलबाट लाइसेन्स लिएका येस्हे लोडोइ लामाको प्रमाणपत्र नै नक्कली भेटिएको हो ।

स्रोतका अनुसार लामाको एमबीबीएस नक्कली भएको भन्दै उजुरी परेपछि काउन्सिलले भारतको बनारस विश्वविद्यालयसंग आवश्यक छानवीन गर्न भन्दै पत्र पठाएको थियो । सोही अनुसार विश्वविद्यालयले छानवीन गर्दा लामाले पेश गरेका प्रमाणहरु नक्कली भएको पत्ता लागेको हो । विश्व विद्यालयले काउन्सिललाई लेखेको पत्रमा पनि लामाको कुनै रेकर्ड नभेटिएको उल्लेख छ ।

भुरौसे हुम्ला स्थायी ठेगाना भएका लामाको काउन्सिल दर्ता नम्वर ४७३४ हो । गैरसरकारी सस्थाको रुपमा झण्डै १० बर्ष देखी हुम्लामा अस्पताल सञ्चालन गर्दै आएका लामा उजुरी परेसंगै फरार रहेको बताइएको छ । उनी नेपाल प्रहरीको समेत फरार सूचीमा रहेका छन् ।